बन्दीपुर अस्पतालका ४ स्वास्थ्यकर्मीसहित ९ जनामा संक्रमण
दमौली : तनहुँको बन्दीपुर गाउँपालिकाका कन्ट्याक्ट ट्रेसिङका क्रममा लिइएका नमुनामा नौ जनामा कोरोना भाइरस पोजिटिभ भेटिएको छ । गत साता संक्रमण देखिएका ११ जनामध्ये क्वारेन्टाइन बाहिरका दुई स्वास्थ्यकर्मी र एक सुरक्षाकर्मीको सम्पर्कमा रहेका व्यक्तिको स्वाब पीसीआर परीक्षणका लागि पठाइएकामा पाँच महिला र चार पुरुषसहित नौजनामा संक्रमण देखिएको हो।
स्वास्थ्य तथा जनसंख्या मन्त्रालयले गरेको नियमित प्रेस ब्रिफका क्रममा टेकुस्थित जनस्वास्थ्य प्रयोगशालामा गरिएको परीक्षणका क्रममा ती व्यक्तिमा संक्रमण भएको प्रवक्ता जागेश्वर गौतमले बताएका थिए । जिल्ला स्वास्थ्य कार्यालय तनहुँले उनीहरु कन्ट्याक्ट ट्रेसिङ गरिएका व्यक्तिहरु भएको पुष्टि गरेको छ ।
कार्यालयका प्रमुख शंकरबाबु अधिकारीका अनुसार पोखरा पठाइएको एक सय एक जनाको नमुना त्यहाँबाट जनस्वास्थ्य प्रयोगशाला टेकु लगिएको थियो । टेकुमा गरिएको परीक्षणमा एक सय एकमध्ये जनप्रतिनिधिसहितका ८७ जनामा कोभिड नेगेटिभ देखिएको सार्वजनिक भएको थियो । परीक्षण गर्न बाँकी नमुनाको सोमबार सार्वजनिक नतिजाले कोभिड पोजिटिभ पुष्टि गरेको हो । संक्रमितमा चार बन्दीपुर अस्पतालका स्वास्थ्यकर्मी छन् । उनीहरु यसअघि संक्रमण देखिएका दुई चिकित्सकको सम्पर्कमा थिए । बाँकी भने क्वारेन्टाइनका व्यक्ति रहेको गाउँपालिकाका अध्यक्ष पूर्णसिं थापाले जानकारी दिए । ‘स्वास्थ्यकर्मी पनि संक्रमित देखिएका छन्,’ उनले भने,‘अब उहाँहरुलाई पनि आइसोलेसनमा राख्छौं ।’
यससँगै बन्दीपुरमा कोभिड पोजिटिभ हुनेको संख्या २० पुगेको छ । यसअघि दुई स्वास्थ्यकर्मी र एक सुरक्षाकर्मी पनि संक्रमित भेटिएपछि गाउँपालिकाले एक साताका लागि अत्यावश्यकबाहेकका सेवा बन्द गर्दै बजार पनि बन्द गराएको थियो । स्वास्थ्यकर्मीमा पोजिटिभ देखिएकाले अस्पतालको सेवा पनि अत्यावश्यक बाहेक बन्द गरिएको छ । जनप्रतिनिधि र अस्पतालका बिरामी अनि सुरक्षाकर्मीसमेतको कन्ट्याक्ट ट्रेसिङ गरिएकामा बाँकीको भने नतिजा नेगेटिभ आएको छ।