जीप दुर्घटना एकको मृत्यु
दमौलीः तनहुँको ऋषिङ गाउँपालिकामा आठ यात्रु सवार जीप दुर्घटनामा पर्दा एकजनाको ज्यान गएको छ । घटनामा परी चालकसहित सात जना घाइते भएका छन् । आफन्तको निधनमा भेटी लिएर गएका यात्रु सवार एक जीप ऋषिङ १ खाल्टेमा खोलामा खस्दा एकजनाको ज्यान गएको छ ।
घटनामा परी चालकसहित जना घाइते भएका छन् । चालकको अवस्था चिन्ताजनक छ । आफन्तको निधनमा भेटी लिएर गएका व्यास ५ का व्यक्ति चढेर चापाघाटबाट ऋषिङको खाल्टे जाँदै गरेको ग १ ज ७१२८ नम्बरको जीप बिहान दिखोलामा खसेको प्रहरी नायब उपरीक्षक युवराज तिमल्सेनाले जानकारी दिए ।
घटनामा घाइतेमध्ये व्यास ५ निवासी ५५ वर्षका राजकुमार श्रेष्ठको उपचारका क्रममा दमौली अस्पतालमा ज्यान गएको हो । घटनामा चालक गम्भीर घाइते छन् । उनको शरीर खोला छेउमा जीपले च्यापेकामा मात्र उद्धार गरिएको ट्राफिक प्रमुख रेशम रानाभाटले जानकारी दिए । 'जीपले च्यापेको रहेछ, 'उनले भने, 'जीप हटाएर उद्धार गरिएको छ।'
घटनामा घाइते र मृतक अधिकांश चापाघाटकै छन् । आफन्त पर्नेहरु मिलेर गएकाले एकै ठाउँका यात्रु परेको स्थानीय अनिल श्रेष्ठले जानकारी दिए । घटनाका घाइतेमध्ये केहीको रत्नहरि र दमौली अस्पतालमा उपचार भइरहेको छ । केहीलाई नेसनल अपोलो अस्पतालमा उपचारपछि थप उपचारका लागि पोखरा पठाइएको बताइएको छ ।