पाल्पा : सरकारको असंवैधानिक कदमविरुद्ध नेकपा प्रचण्ड- माधव नेपाल समूहले गरेको देशव्यापी आमहडतालको प्रभाव पाल्पामा पनि परेको छ । आमहडतालको कारण पाल्पाको जनजीवन पूर्णरुपमा प्रभावित भएको छ ।
पाल्पामा लामो तथा छोटो दुरीका सवारी साधन संचालनमा आएका छैनन् भने उधोग धन्दा कलकारखाना, शैक्षिक संस्था व्यापार व्यवसाय पूर्णरुपमा बन्द रहेका छन् । कोरोना संक्रमणका कारण लामो समयसम्म बन्द पछि संचालनमा रहेका शैक्षिक संस्थामा पनि आमहडतालको प्रभाव परेको छ ।
पाल्पामा भएर संचालन हुने सिद्धार्थ राजमार्ग, तानसेन तम्घास सहायक राजमार्गमा एम्वुलेन्स, दूध, पानी, शव बहान, फोहोर फाल्ने सवारी साधन मात्र संचालनमा आएका छन्। सर्वसाधारणका सवारी साधन भने चलेका छैनन् ।
आमहडताल सफल बनाउन तानसेनका चोकचोकमा नेकपा प्रचण्ड- माधव नेपाल समूहका कार्यकर्ताहरु उत्रिएका छन् । आमहडतालको कारण शान्ति सुरक्षामा खलल नहोस् भनी चोक चोकमा नेपाल प्रहरी तथा शसस्त्र प्रहरी तैनाथ छन् ।
प्रतिक्रिया दिनुहोस !
