कर्मचारी माग गर्दै कुश्मा नगरपालिकामा स्थानीय र जनप्रतिनिधको तालाबन्दी

कुश्मा: लामो समयदेखि वडा सचिव नभएको भन्दै कुश्मा नगरपालिका वडा नं. २ खुर्कोटका स्थानीय बासिन्दा र जनप्रतिनिधिले समेत कुश्मा नगरपालिकामा तालाबन्दी गरेका छन् ।

जनप्रतिनिधिको समेत सहभागितामा कुश्मा नगरपालिकाको कार्यालयमा आइतबार दिउँसो तालाबन्दी गरिएको हो ।  स्थानीयले वडा कार्यालयमा समेत ताला लगाएका हुन् । वडाध्यक्ष यदुनाथ शर्मा बास्तोलाको नेतृत्वमा आएका स्थानीयले कुश्मा नगरपालिकाको मूल गेटमा ताला लगाएका हुन् ।

गत कार्तिक १४ देखि स्वास्थ्यचौकीका ईन्चार्जलाई काजमा खटाएर अहिलेसम्म वडा सचिव नपठाएको भन्दै नगरपालिकाको ध्यानाकर्षण गराउन तालाबन्दी गर्नुपरेको वडाध्यक्ष बास्तोलाले बताए ।

नगरपालिकाले काजमा खटाएका स्वास्थ्यचौकीका ईन्चार्ज टेकनाथ सुवेदीले वडा र स्वास्थ्यचौकीको काम हेर्न नभ्याएको बताउँदै आएका छन् ।

नगरप्रमुख, उपप्रमुख र प्रमुख प्रसासकीय अधिकृतलाई धेरै पटक सचिवको माग गरे पनि ९ महिनासम्म सचिव नखटाएको भन्दै वडाका जनप्रतिनिधिहरु सहित आएका खुर्कोटवासीहरुले तालाबन्दी गरेका हुन् ।

सचिव नहुँदा दैनिक प्रशासनिक कामकाजमा समस्या भएको वडाध्यक्ष यदुनाथ शर्मा बास्तोलाले गुनासो गरेका छन् । वडा कार्यलयमा कार्यरत सचिव सञ्जु शर्मा कोभिड संक्रमित भएर कार्यालयमा आउन नपाएकाले यो अवस्था सिर्जना भएको कुश्मा नगरपालिकाका निमित्त प्रमुख प्रशासकीय अधिकृत विष्णुप्रसाद तिवारीले बताए ।

उनले कार्यालयले खटाएका सचिव निको भएपछि हाजिर हुने भएकाले स्थानीयलाई आक्रोशित नबन्न अनुरोध गरेका छन् । सचिव यथाशिघ्र हाजिर गराउने आश्वसनपछि कार्यालयमा लगाएको ताला साँझ खोलिएको थियो । वडा कार्यालयको ताला भने खोलिएको छैन ।