गण्डकीका मुख्यमन्त्रीद्वारा पहिरो पीडितलाई राहत वितरण

दमौली: गण्डकी प्रदेशका मुख्यमन्त्री कृष्णचन्द्र नेपाली पोखरेलले तनहुँको ऋषिङको बाढी पहिरो प्रभावित क्षेत्रको निरीक्षण गर्दै पहिरोले ज्यान गुमाएकाको परिवारलाई राहत रकम वितरण गरेका छन् ।

शुक्रबार दिउँसो प्रदेश सरकारका तर्फबाट जनही ५० हजार र संघबाट २ लाख गरी साढे दुई लाख रुपैयाँ वितरण गरेका हुन् । पहिरोमा ज्यान गुमाएका खुमबहादुर आले तथा देवीसरा थापाका परिवारलाई राहत हस्तान्तरण गरेका हुन् ।

उनले प्रदेश सरकारको सहयोगमा मर्मत भइरहेको ऋषिङको श्रङ्ग पथको समेत निरीक्षण अवलोकन गरे । त्यस क्रममा मुख्यमन्त्री पोखरेलले प्रदेश सरकारले विपदसँग जुध्न विशेष योजना र राहत कार्यक्रम ल्याएको बताए ।

मुख्यमन्त्री पोखरेलले ऋषिङको बाटो नियमित बनाउनु तथा प्रदेशभर राहत र उद्धारमा निरन्तर जारी रहने प्रतिवद्धता जनाए । कार्यक्रममा गाउँपालिका अध्यक्ष राजेन्द्रकृष्ण श्रेष्ठले विपत्तिका समयमा गाउँपालिकाले सक्दो राहत र पुनर्स्थापनाको प्रयास गरेको भन्दै आगामी दिनमा पनि सक्रिय रहने प्रतिवद्धता जनाए ।