कुश्मा : पहिरोले रोकिएको मध्यपहाडी लोकमार्गको पर्वत खण्ड सुचारु भएको छ । निरन्तर वर्षाले मोदी गाउँपालिका ६ बेतनीमा पहिरो झरेर आज बिहानै देखि रोकिएको सडक केहिबेर अघिदेखि सुचारु भएको हो ।
पहिरोले रोकिएको सडक सुचारु भएपछि कास्कीको नयाँ पुल र पर्वतको डिमुवामा रोकिएका सवारीसाधान गन्तब्यतर्फ लागेको जिल्ला प्रहरी कार्यालय पर्वतका प्रहरी नायव उपरीक्षक शिवराज बुढाथोकीले जानकारी दिए। निरन्तर वर्षाले पहिरोले जोखिम भने कायमै रहेको उनले बताए ।
यसैबीच निरन्तर वर्षाले मध्यपहाडी लोकमार्गको पर्वत खण्डका विभिन्न ठाउँमा पहिरो गएको छ । सडक माथिबाट लगातार पहिरो झर्ने क्रम नरोकिएपछि मध्यपहाडी लोकमार्गको यात्रा जोखिमपुर्ण बनेको छ ।
लोकमार्गको पर्वत-बागलुङ खण्ड र पर्वत-पोखरा खण्डका ठाउँठाउँमा पहिरो खस्ने क्रम रोकिएको छैन । यो खण्डअन्तर्गत पर्वतको नयाँ पुल, सहस्रधारा, अर्मादी, र रिठेखालामा सडक माथिबाट ढुंगा, माटो खस्ने क्रम नरोकिएको जिल्ला प्रहरी कार्यालय पर्वतले जनाएको छ । प्रहरीका अनुसार वर्षा हुने वित्तिकै ढुंगा, माटो बग्ने क्रम शुरु हुने भएकाले यो खण्डमा यात्रा गर्न जोखिम रहेको छ ।
शनिवार दिनभर ठुला ठुला ढुंगाहरु खसेपछि सडक एकतर्फि रुपमा मात्र संचालन भएको थियो । वर्षा निरन्तर भएकाले कतिबेला ठुलो पहिरो झरेर जोखिम निम्तिने हो भन्ने खतरा रहेको जिल्ला प्रहरी कार्यालय पर्वतका प्रहरी निरिक्षक राजेन्द्र अधिकारीले जानकारी दिए । उनका अनुसार अहिलेपनि उक्त खण्ड अवरुद्ध जस्तै बनेको छ । साना सवारीसाधनहरु मुस्किलले वारपार भएपनि बस तथा मालबाहक ट्रकहरु भने ठप्प रहेको अधिकारीले जानकारी दिए ।
वर्षा नरोकिएकाले पहिरो पन्छाउन मुस्किल भएको छ । स्काभेटर लगाएर पन्छाउने वित्तिकै फेरी माथिबाट खसिहाल्छ, झनै जोखिम बढेको छ उनले भने । यता कुश्मादेखि पोखरा जाने खण्डमा पनि ठाउँठाउँमा पहिरो खसिरहेको प्रहरीले जनाएको छ ।
निर्माणाधिन यो सडकमा गत वर्ष ठुला पहिरा गएका थिए । अहिलेपनि तीनै ठाउँबाट निरन्तर खस्ने क्रम रोकिएको छैन । यो सडकको स्वरुप कच्ची सडकजस्तै बनेको छ । पर्वतको कुश्मादेखि बागलुङसम्मको १५ किलोमिटर सामान्यता आधा घण्टामा यात्रा गर्न सकिने भएपनि अहिले भने १ देखि डेढ घण्टासम्म लाग्ने गरेको सवारीचालकहरुको गुनासो छ ।
प्रतिक्रिया दिनुहोस !
