अघिल्लो चुनावमा वडाध्यक्षमा पराजित भए, यसपालि पालिका प्रमुख नै जिते
रामेछाप : गत स्थानीय निर्वाचनमा वडाध्यक्षमा पराजित दुई उमेदवार पालिका अध्यक्षमा निर्वाचित भएका छन्।
पालिका अध्यक्षमा निर्वाचित केशव महत र काजीबहादुर खड्का गत स्थानीय निर्वाचनमा वडा अध्यक्षमा पराजित भएका थिए।
महत लिखु तामाकोसी गाउँपालिका वडा नम्बर ४ र काजीबहादुर खड्का गोकुलगंगा गाउँपालिका वडा नम्बर ५ को अध्यक्षमा पराजित भएका थिए।
बैशाख ३० गते सम्पन्न भएको स्थानीय निर्वाचनमा महत लिखुतामाकोशी गाउँपालिका र काजीबहादुर खड्का गोकुलगंगा गाउँपालिकाको अध्यक्ष पदमा उम्मेदवार थिए। हालै सार्वजनिक मत परिणाममा दुबैजना पालिका अध्यक्षमा निर्वाचित भएका हुन्।
गोकुलगंगामा ६ हजार ९३ मत प्राप्त गरेका काजीबहादुर खड्काले निकटतम प्रतिद्वन्द्वी नेकपा एमालेका खड्गबहादुर सुनुवारलाई १ हजार ३८३ को फराकिलो अन्तरले पराजित गरे। सुनुवारले ४ हजार ७१० मत प्राप्त गरेका थिए।
यस्तै लिखुतामाकोशीमा महतले ५ हजार ११२ मत प्राप्त गर्दै निर्वाचित भए। उनले निकटतम प्रतिद्वन्दी एमालेका कमल कडेरियालाई १ हजार १०४ मतले पराजित गरे। कडेरियाले ४ हजार मत प्राप्त गरेका छन्।