महोत्तरी: पिताम्बर महतो सत्ता गठबन्धनबाट महोत्तरी-१(क)का साझा उम्मेदवार हुन् । लोकतान्त्रिक समाजवादी पार्टी नेपालका नेता महतोले जल र जमिनको उपयोग गरी आफ्नो क्षेत्रलाई समृद्ध बनाउने योजनासहित चुनावी मैदानमा होमिएका छन् । नेता महतोसँग अन्नपूर्णकर्मी गोविन्द महतोले गरेको कुराकानीको सम्पादित अंश:
चुनावी प्रचार कस्तो चल्दैछ ?
हामी प्रचारको अन्तिम समयमा आएका छौँ । घरदैलो अभियान जारी छ । सकेसम्म सबै मतदातासँग पुगेर मत माग्ने काम गरिरहेका छौँ । समय अब थोरै छ । धेरैलाई भेट्नुछ । हामी मत माग्नेसँगै मत कसरी हाल्ने भनेर पनि सिकाउँदैछौँ ।
तपाइँलाई भोट किन दिने?
यो क्षेत्रको समस्या समाधान गर्न नै म यहाँको उम्मेदवार भएको हो । प्रदेश सभामा गएर प्रदेश सञ्चालनका लागि चाहिने नियम, कानून निर्माणसँगै प्रदेशलाई विकासको गतिमा अघि बढाउने काम गर्नुछ ।
मैले अल्पकालिन, मध्यकालिन र दीर्घकालिन विकासका योजना लिएर आएको छु । यी योजनालाई साकार बनाए हाम्रो क्षेत्र र प्रदेश समृद्ध बन्नेछ । त्यसैले मेरा योजना साकार बनाउन मलाई भोट दिनपर्छ ।
मैले मेरो कामको प्राथमिकीकरण गरेको छु । जसअन्तर्गत अघिल्लो जनप्रतिनिधिले गरेको राम्रो कामको निरन्तरता दिन्छु । कृषिमा आधुनिकीकरण, पुर्नजागरण, भूमीको वर्गीकरण, कृषिको पकेट क्षेत्र तय गरी आवश्यक बालीको विकास मेरा एजेण्डामा छन् । मैले हाम्रो क्षेत्रलाई समृद्ध बनाउन कृषिको विकासलाई नै प्राथमिकतामा राखेको छु । मलखाद्यको व्यवस्थापनसहित कृषि उपजको भण्डारण, खेतीयोग्य जग्गामा सिंचाई लगायतको सुविधा जनतालाई दिएर आम्दानीको बाट बढाउने छु ।
विद्यालयलाई पूर्वाधार सम्पन्न प्रविधिमैत्री डिजिटल शैक्षिक प्रविधि, किसाननगरमा प्राकृतिक व्यवस्थापन कलेजमा अध्ययन अध्यापन गराईने विषय मेरो योजनामा राखेको छु । मधेसलाई मरुभुमीकरणबाट बचाउन चूरे वनको संरक्षण, सामूदायिक धनको रुपमा वनलाई अगाडी बढाउने नीति लिनेछु । यी कुरा कार्यान्वयन गर्न जनताले मलाई भोट दिनुहुन्छ भन्नेमा विश्वस्त छु ।
चुनावी अभियानका क्रममा जनताले के भने ?
हामी चुनावी अभियानमा हिँड्दा जनताका धेरै अपेक्षा सुन्यौँ । सबैले पूर्वधारको विकासलाई प्राथमिकतामा राख्नुभएको छ । स्थानीय निकायदेखि प्रदेश वा प्रतिनिधि सभाका जहाँका पनि जनप्रतिनिधिले विकासका काम गर्नुपर्छ भन्ने सोच्नुहुन्छ । जिम्मेवारी अनुसार काम फरक हुन्छ । हामीले उहाँहरूका अपेक्षा पूरा गर्ने काम गर्छौँ ।
जनताले विशेषतः ग्रामीण समस्या मल, खाद्य, सडक, बाटो, पूल, पूलेसा जस्ता समस्याको समाधान खोज्न आग्रह गरेका छन् । मैले सकेसम्म सबैका गुनासा सुनेर समस्या हलको प्रयास गर्छु भनेको छु ।
तपाइँले जनतासँग गरेका प्रतिबद्धता के के हुन् ?
परिवर्तन धेरै भए । तर नागरिकको दैनिकी परिवर्तन भएन । गरिबी बढेको छ । जनतालाई रोजिरोटीकै समस्या छ । जनताको दैनिकी सुधारका लागि मैले काम गर्ने प्रतिबद्धता जनाएको छु ।
यसका लागि कृषिलाई आधुनिकीकरण गरेर आम किसानको आर्थिक विकास गराउन म लाग्नेछु । सीप सिकाउने, उत्पादन र बजार जोड्ने, उत्पादित वस्तुको मूल्य निर्धारण गर्ने लगायतका काममा मेरो भूमिका हुन्छ ।
भौतिक पूर्वाधारको विकासमा पनि काम गर्नेछु । कृषि सडक सञ्जाल, गुणस्तरीय शिक्षा, निःशुल्क स्वास्थ्य उपचार, शुद्ध खानेपानी जस्ता आधारभुत आवश्यकता पूरा गर्न म लागि पर्छु । यी कामका लागि मतदाताले मलाई मत दिनुहुन्छ भन्नेमा विश्वस्त छु ।
प्रतिक्रिया दिनुहोस !
