बारामा प्रेमीको हत्या गरी फरार रोशनी श्रीमान्सहित भारतबाट पक्राउ
वैशाख ८, २०८० शुक्रबार १७:३:५०
कलैया : बाराको विश्रामपुरमा एक युवकको हत्या गरी फरार रहेका दम्पतीलाई प्रहरीले चार महिनापछि पक्राउ गरी शुक्रबार सार्वजनिक गरेको छ । विश्रामपुर गाउँपालिका- ५ इटियाहीमा मंसिर २७ गते भएको उक्त घटनामा संलग्न रहेको अभियोगमा प्रहरीले श्रीमान् श्रीमतीलाई पक्राउ गरेको हो ।
पक्राउ पर्नेमा वीरगन्ज महानगरपालिका १५ भिष्वाका २४ वर्षीय रामु भन्ने कैलाश महतो र उनकी श्रीमती २० वर्षीया रौशनी देवी रहेका छन् । जीतपुरसिमरा उपमहानगरपालिका ८ राजानगरका २२ वर्षीय महेश साहको हत्या गरी भारतको विभिन्न क्षेत्रमा लुक्दै आएका उनीहरूलाई नेपाल–भारत सीमा क्षेत्रबाट बुधबार पक्राउ गरेको बाराका प्रहरी उपरीक्षक होबिन्द्र बोगटीले जानकारी दिए ।
प्रहरी उपरीक्षक बोगटीका अनुसार उनीहरूले महेशको हत्या गरी इटियाहीस्थित भुलन चौरसियाको खेतमा रहेको परालको भुसमा शव लुकाएर फरार भएका थिए । डिस (केवल) को तारले घाँटी कसेर महेशको हत्या गरेको र अपराध लुकाउन परालको भुसमा शव लुकाएर उनीहरु फरार भएको प्रहरी उपरीक्षक बोगटीले जानकारी दिए ।
मृतक महेश र कैलाशकी श्रीमती रौशनीबीच प्रेम सम्बन्ध रहेको र सोही कारण घटना भएको प्रहरीको भनाइ छ । प्रहरीका अनुसार महेश र रौशनी लामो समयदेखि ‘लिभिङ टुगेदर’ सम्बन्धमा रहदै आएको अनुसन्धानबाट खुलेको छ ।
महेश र रौशनीबीच इटियाहीमा भेट्दै गर्दा श्रीमान कैलाश आएको र सोही समयमा विवाद भएपछि श्रीमान्-श्रीमती मिलेर हत्या गरेको प्रहरी उपरीक्षक बोगटीले बताए ।
‘दुवैजना लिभिङ टुगेदरमा बस्दै आएका थिए । दुवैबीच विवाह हुने कुरा समेत भएको थियो । तर, रौशनी विवाहित भएका कारण महेशका परिवारले मानेका थिएनन्,' प्रहरी उपरीक्षक बोगटीले भने, ‘रौशनी र महेश मंसिर २७ गते भेट गरिरहेको स्थानमा कैलाश पुगे र सोही क्रममा विवाद भएपछि श्रीमान् श्रीमती मिलेर हत्या गरेको देखियो ।’
घटनापछि रौशनी र कैलाश भारतको बिहार, दिल्ली, केरलामा लुकेर बसेका थिए । भारत प्रहरीसँगको समन्वयमा पक्राउ गरिएका उनीहरूमाथि थप अनुसन्धान भइरहेको प्रहरी उपरीक्षक बोगटीले जानकारी दिए ।
प्रतिक्रिया दिनुहोस !
