सप्तरीमा वडा अध्यक्ष रायको मृत्यु, आइतबार डाक्नेश्वरी नगरपालिकामा शोक बिदा

सप्तरी : एक वर्षदेखि मष्तिष्क पक्षघातबाट पीडित सप्तरीको डाक्नेश्वरी नगरपालिका-४ का वडा अध्यक्ष हरीप्रसाद रायको निधन भएको छ। ६१ वर्षीय रायको घरमा मृत्यु भएको नगरपालिका कार्यालयले जनाएको छ । नेपाल र भारतका विभिन्न अस्पतालमा उपचार पश्चात उनी घरमा औषधि सेवन गरिरहेका थिए ।

नेपाली कांग्रेसबाट उम्मेदवार बनेका राय स्थानीय तह निर्वाचन २०७९ मा तीन सय ३३ मत ल्याएर वडा अध्यक्षमा निर्वाचित भएका थिए । निर्वाचित भएको करिब ६ महिनामा उच्च रक्तचापका कारण मष्तिष्क पक्षघातबाट पीडित भएपछि राय कामकाज गर्न अशक्त र असमर्थ थिए । 

वडा अध्यक्ष अमातको निधन भएपछि आइतबार डाक्नेश्वरी नगरपालिका कार्यालय र सो अन्तर्गतका सबै कार्यालयहरुमा शोक बिदा दिइएको डाक्नेश्वरी नगरपालिकाका नगर प्रमुख रामलखन मुखियाले जानकारी दिए । वरिष्ठ चिकित्सक एवं न्यूरोलोजिष्ट डा. राजु पौडेलका अनुसार विश्वमा बर्सेनि एक करोड ३० लाख व्यक्तिलाई पक्षघात हुने गरेको छ । पक्षघात भएकामध्ये एक तिहाइले अकालमा ज्यान गुमाउनुपरेको छ । विश्वमा हरेक चार जनामा एक जनालाई र छ सेकेण्डमा एक जनालाई पक्षघातको सम्भावना रहेको डा पौडेलको भनाइ छ । 

उच्च रक्तचाप, मधुमेह, मोटोपन, धुम्रपान, निष्क्रिय जीवन पद्धति, असन्तुलित आहार र मुटुको चाल गढबढ हुँदा पक्षघातको सम्भावना हुने गर्दछ । सन्तुलन गुम्नु, अनुहार बाङ्गो हुनु, आँखाको ज्योति अचानक गुम्नु, बोली लरबराउनु, हातखुट्टा लुरो हुनु पक्षघातको लक्षण भएको भन्दै चिकित्सकहरुले यस्ता लक्षण देखिए तत्काल अस्पताल पुग्न सके उपचार सम्भव रहेको बताउँछन् ।