दोलखा : चीनको तिब्बतसँग सिमाना जोडिएको दोलखाको विगु गाउँपालिका लामाबगरबाट बरामद भएको ११ केजी सुन तस्करी गिरोहका थप एकजना चिनियाँ नागरिक पक्राउ परेका छन् । बुधबार प्रहरीको केन्द्रीय अनुसन्धान ब्युरो (सीआईबी)ले चीनको सिचुवान प्रान्तका टासी दावा भनिने आगर लामालाई काठमाडौंको स्वयम्भूबाट पक्राउ गरेको हो ।
प्रहरीको केन्द्रीय अनुसन्धान व्युरो (सीआईबी) का अनुसार तासी दावाको निर्देशनमा लामाबगरको फलाक नाका हुँदै सुन तस्करी भएको हो । स्वयम्भूमा बस्दै आएका दावाले सुन तस्करीको नाइके भएको भनिए पनि उनी सुन मालिक हुन् या होइनन् भन्ने यकिन हुन सकेको छैन ।
यसअघि पनि चीनको सिचुवान प्रान्तका एक चीनियाँ नागरिक र ९ जना नेपाली सुन प्रकरणमा पक्राउ परिसकेका छन् । चिनियाँ नागरिक ग्वाङ रोउ,लालबहादुर तामाङ र सनथ प्रधान पक्राउ परेका थिए । पक्राउ परेकाहरूको बयानका आधारमा लामालाई सीआईबीले पक्राउ गरेको हो ।
हालसम्म ११ केजी सुन प्रकरणमा ११ जना पक्राउ परिसकेका छन् । असोज १० र १२ गते प्रहरीले विगु गाउँपालिका–३ जामुनेबाट ७ केजी र असोज १३ गते विगु गाउँपालिका– १ लामाबगरबाट चीनको सीमाबाट तस्करले ल्याएको सुन बरामद गरेको थियो ।
चीनको रोङजिया नाका हुँदै पैदलमार्गबाट सुन तस्करी भएको विषयमा सीआईबीले अनुसन्धान गरिरहेको छ ।
प्रतिक्रिया दिनुहोस !
