टी-ट्वान्टी विश्वकप एसिया क्षेत्र छनोट फाइनल
खेलमा देखिएका कमजोरीलाई दोहोरिन दिँदैनौं : कप्तान पौडेल
नेपालले सोमबार पहिलो खेल सिंगापुरसँग खेल्नेछ।
काठमाडौं : आईसीसी टी–ट्वान्टी विश्वकप एसिया क्षेत्र छनोट फाइनलको खेल सोमबारबाट काठमाडौंमा सुरू हुँदैछ । टियु र मुलपानी क्रिकेट मैदानमा हुने छनोट यहिँ कात्तिक १३ देखि १९ गतेसम्म आयोजना हुन लागेको हो ।
नेपाल रहेको समूह ’ए’ मा सिंगापुर, ओमान र मलेसिया छन् । समूह ’बी’ मा युएई, बहराइन, हङकङ र कुवेत छन् । छनोटको पहिलो खेलमा नेपालले कात्तिक १३ गते सिंगापुरसँग टियु मैदानमा खेल्नेछ । खेलअघि नेपाली राष्ट्रिय टीमका मुख्य प्रशिक्षक र कप्तानले विश्वकप एसिया क्षेत्र छनोट नेपालका लागि अवसर भएको र आफूहरु उत्साहित रहेको बताएका छन् ।
खेलअघि आइतबार टियु मैदान किर्तिपुरमा आयोजित प्रि–म्याच कन्फ्रेन्समा प्रशिक्षक मोन्टी देसाईले नेपालले केहि समयदेखि लगातार खेल खेलिरहेको र कमीकमजोरीहरु सुधार गर्दै अघि बढेको बताए । उनले प्रत्येक खेलमा छुट्टाछुट्टै रणनीतिका साथ अघि बढ्ने जानकारी दिए ।
त्यस्तै कप्तान रोहित पौडेलले यसअघिको खेलमा देखिएका कमी कमजोरीलाई अबको खेलमा दोहरिन नदिने बताए । उनले सन्दीप लामिछाने समावेश भएसँगै टिम व्यालेन्स र बलियो भएको जिकिर गरे ।
नेपालले कात्तिक १४ गते मलेसिया र कात्तिक १६ गते ओमानसँग खेल्नेछ । यस छनोटको फाइनल पुग्ने दुई टोलीले अर्को वर्ष अमेरिका र वेस्ट इन्डिजमा आयोजना हुने टी–ट्वान्टी विश्वकप खेल्न पाउने छन् ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)