बझाङ : बझाङ प्रदेश सभा क्षेत्र नम्बर- १ को उपनिर्वाचनमा नेकपा (एमाले) उम्मेदवार दमनबहादुर भण्डारीको बुवाको दाहसंस्कार गरिएको छ । एमाले उम्मेदवार भण्डारीका बुवा चक्रबहादुर भण्डारीको ८८ वर्षको उमेरमा मंगलबार बिहान निधन भएको हो ।
बुधबार भ्यागुते खेलाको सेती दोभानमा उनको अन्तिम संस्कार गरिएको हो । उनको पार्थिव शरीरमा एमाले स्थायी कमिटी सदस्य कर्ण थापा,पोलिट ब्युरो सदस्य राजेन्द्र रावल र केन्द्रीय सदस्य ऐन महरले सामूहिक रुपमा पार्टीको झण्डा ओढएर श्रद्धाञ्जली दिएका थिए ।
श्रद्धाञ्जली सभामा बोल्दै स्थायी कमिटी सदस्य कर्ण थापाले शोकलाई शक्तिमा बदल्नु पर्ने बताएका थिए । ‘आगामी १५ गते यहाँ उपनिर्वाचन हुँदैछ निर्वाचन उत्कर्षमा पुगेको बेला यस्तो दु:खद घटना सुन्नु परेको छ’ थापाले भने,‘यो शोकलाई अब शक्तिमा बदल्नु पर्छ । सबै जुटौं। लागौं।'
२०७९ मंसिरको निर्वाचनमा बझाङ–१ बाट निर्वाचित नेपाली कांग्रेसका प्रदेश सभा सदस्य पृथ्वीबहादुर सिंहको २०७९ असार ५ गते सवारी दुर्घटनामा मृत्यु भएपछि वैशाख १५ गते उपनिर्वाचन हुँदै छ ।
यहाँ एमाले र कांग्रेसबीच कडा प्रतिस्पर्धा देखिएको छ। एमालेबाट दमन भण्डारी उम्मेदवार छन् भने काङ्ग्रेसबाट अभिषेक सिंह उम्मेदवार छन् । अभिषेक स्वर्गीय सिंहका छोरा हुन्।
प्रतिक्रिया दिनुहोस !
