विराटनगर : मोरङको लेटाङमा पानी जम्मा गर्न सामुदायिक वनभित्र बनाइएको पोखरीमा डुबेर एकजनाको मृत्यु भएको छ । लेटाङ नगरपालिका–२ मा रहेको गारापानी सामुदायिक वनभित्रको अन्दाजी १२/१५ फिट गहिराइ भएको राजा–रानी पोखरीमा डुबेर केराबारी गाउँपालिका–९ का ५९ वर्षीय भक्तबहादुर लिम्बूको मृत्यु भएको हो ।
पानीको संकट टार्नका लागि स्थानीय उपभोक्ताले वनभित्रको जमिनमा पोखरी बनाएर पानी जम्मा गर्दै आएका थिए । मोरङ प्रहरीका प्रवक्ता डीएसपी ज्ञानेन्द्रबहादुर बस्नेतका अनुसार पत्नी विष्णुमाया लिम्बूसँगै रहेका भक्तबहादुर नुहाउन भनी कपडा खोलेर आइतबार साँझ ५:४० बजेतिर पोखरीमा पसेका थिए ।
निक्कै बेरसम्म पोखरीबाट बाहिर ननिस्किएपछि खोजी सुरु गरिएको थियो । पोखरीमा डुबेर पति बेपत्ता भएको जानकारी विष्णुमायाले स्थानीय र प्रहरीलाई गराएकी थिइन् । घटनाको जानकारी पाउनसाथ भक्तबहादुरको खोजीका लागि इलाका प्रहरी कार्यालय लेटाङबाट इन्सपेक्टर भीमलाल ओलीको नेतृत्वमा टोली खटिएको थियो ।
स्थानीयको सहयोग लिएर प्रहरीले निक्कै बेरसम्म खोजी गर्दा पनि भक्तबहादुर फेला नपरेपछि नेपाल र सशस्त्र प्रहरीको संयुक्त गोताखोर टोली परिचालन गरिएको डीएसपी बस्नेतले बताए । उनका अनुसार खोजी गर्ने क्रममा गोताखोर टोलीले राति ९ बजेतिर भक्तबहादुरको शव फेला पारेर पोखरीबाट बाहिर निकालेको हो ।
टाउको लगायत शरीरका विभिन्न भागमा चोटपटक रहेको अवस्थामा शव फेला परेको उनले बताए । शवलाई पोस्टमार्टमका लागि उर्लाबारीको मंगलबारेस्थित मदन भण्डारी अस्पताल एवं ट्रमा सेन्टरमा लगिएको छ । भक्तबहादुरकी पत्नी विष्णुमाया भने सकुशल रहेको जानकारी डीएसपी बस्नेतले दिए । इन्सपेक्टर भीमलाल ओली नेतृत्वको टोलीले घटनाको अनुसन्धान सुरु गरेको छ ।
प्रतिक्रिया दिनुहोस !
