हुम्ला : कहीँ समथर,कहीँ थुम्काथुम्की ,कहीँ ,भिरालो ठाउँ,कहीँ अग्लाअग्ला चुचुरा, कतै फाँट । रंगीचंगी फुलैफूलले भुइँमा कार्पेट बिच्छयाएर झैं भान हुन्छ । यो भूगोलमा टेकेर जब जोकोहीले आसपासका दृश्य नियाल्छन् तब मन नै प्रफुल्लित हुन्छ । कञ्चन निलो आकाश, आँखाले भ्याएसम्म देखिने हिमाल, हिँउ बोकेर हुइकिने खोलानाला,बेलाबेला लुकामारी खेल्ने कुहिरो अनि स्पर्श गर्ने चिसो सिरेटो यदाकदा संगीतको धुनजस्तो गुञ्जने नदीनालाहरू । यस्तो लाग्छ कुनै स्वर्गको एक टुक्रमा छौं । जति बयान गरेपनि पुग्दैन। चंखेली गाउँपालिका ५ स्थित टाँके भ्यालीको ।
यो भ्याली आफैमा कुशल एक चित्रकारको हस्तशिल्प झैं लाग्छ । हुम्ला जिल्लाको लिमी भ्याली,करण भ्याली र टाँके भ्याली छन् । ५२०० मिटरको गोरख हिमाललाई पृष्ठभूमिमा राखेर यहाँ आउने आन्तरिक र बाह्य पर्यटकलाई स्वागत गर्छ यस भ्यालीले।
प्रकृतिसँग र प्रकृतिको काँखमा रमाउन उत्सुक पर्यटकहरूका लागि गज्जबको गन्तव्य पनि हो टाँके भ्याली । कर्णालीलाई अझै अभाव,गरिबी,दु:ख र पछौटेपनको पर्यावाचीको रुपमा चित्रण गरिन्छ । घुमन्तेहरु कर्णाली पुग्छन्। आँगनमा खेलिरहेका बालबालिका तस्बिर खिच्छन् । विश्लेषणहरू /अन्वेषकहरू कर्णाली आउँछन्, भोगको आयतन नापेर जान्छन्।
पत्रकारहरू पुग्छन् आफ्नो दुनो सोझ्याउने काम गर्छन् । तर कर्णालीमा रोग निको गर्न जडीबुटी छ, भोग मेटाउने अन्न यही छ । तर,बुझ्दैनन् । उल्टै नराम्रो प्रचारप्रसार मात्रै गरिदिन्छन्। जटामसी,गुच्चीच्याउ,पदमचाल, पाँचऔँले,सेतो चिनी, अतिस, कुटकी,सर्पगन्धलगायतका जडीबुटी यहीँ फाँटमा पाइने गरेको चंखेली गाउँपालिका -५ का स्थानीय भैरब तामाङले बताए । टाँके भ्यालीमा पशु चौपायहरूले समेत शोभा बढाएका छन्।
यहाँ घुम्न आउने आन्तरिक बाह्य पर्यटकहरू तालतलैया,झरना,नदीनाला र टाँके भ्यालीको रमणीय दृश्यमा लोभिने गर्छन् । यो साच्चिकै भू स्वर्ग हो यसको प्रचारप्रसार नभएर अहिलेसम्म गुमनाम रहेको खेली गाउँपालिका ५ का वडाध्यक्ष हर्कधन तामाङले दुखेसो पोखे।
बाटोमा भेटिने कञ्चन खोला नाला, अविरल बगिरहने झरना, घाँसे मैदान जति हेरेपनि मन अघाइदैन । यहाँका फाँटहरूले मौसम अनुसार रुप फेर्न गर्छन् । हिँउदमा सेताम्मे हुन्छन् भने वर्षायाममा रंगीचंगी । हरिया फाँट ढक्कमक्क फुल्ने फुलहरूले बिछटै रुपवती देखिन्छन् ।
स्थानीय सरकारले पनि यस क्षेत्रका प्रवर्द्धन गर्न चासो र चिन्ता नदेखाउँदा पर्यटकीयस्थल समेत रहेको चंखेली गाउँपालिका- ५ को टाँके भ्याली ओझेलमा छ । टाँके भ्यालीको प्रचारप्रसार गर्न सके गाउँपालिकाको आन्तरिक आम्दानीको श्रोत बन्न सक्ने स्थानीय जानकारहरू बताउँछन्।
प्रतिक्रिया दिनुहोस !
