महोत्तरी : १५० किलो गाँजासहित दुई जना पक्राउ परेका छन्। औरही नगरपालिका-१ औरही चेक पोष्ट अगाडि सडकबाट गाँजा करिब १ सय ५० किलोग्राम, नगद ७७ हजार रुपैयाँ र मोबाइल ३ थानसहित २ जनालाई शनिबार दिउँसो प्रहरीले पक्राउ गरेको छ।
पक्राउ पर्नेहरूमा सर्लाही लालबन्दी नगरपालिका-११ का २७ वर्षीय आकाश ठाकुर र हरिवन नगरपालिका-२ का ३० वर्षीय पेमा दोर्जे लामा रहेका छन्।
जिल्ला प्रहरी कार्यालय महोत्तरी र प्रहरी चौकी औरहीबाट खटिएको प्रहरीले गौशलाबाट औरहीतर्फ आउँदै गरेको युपि ५७ एएफ ९४९५ नम्बरको कारलाई जाँच गर्ने क्रममा कारको डिकीमा ३० वटा पोकामा रहेको उक्त परिमाणको गाँजा फेला पारी चालक आकाश र कारमा सवार पेमा दोर्जेलाई पक्राउ गरेको हो।
यसबारे आवश्यक अनुसन्धान गरिरहेको जिल्ला प्रहरी कार्यालयले जनाएको छ।
प्रतिक्रिया दिनुहोस !
