रौतहट : यही चैत ७ गतेबाट सुरु हुने माध्यामिक शिक्षा परीक्षा (एसईई) २०८१ मा रौतहट जिल्लाबाट १० हजार ४ सय ८४ विद्यार्थी सहभागी हुने भएका छन्। शिक्षा विकास तथा समन्वय इकाइ रौतहटका अनुसार साधारण, प्राविधिक तथा ग्रेड वृद्धि गरी कूल १० हजार ४ सय ८४ परीक्षार्थीले परीक्षा दिने भएका हुन्।
जिल्लाका ९९ वटा सामुदायिक, २० वटा संस्थागत र ८ वटा प्राविधिक विद्यालय गरी १ सय २७ विद्यालयका विद्यार्थीका लागि ४० वटा परीक्षा केन्द्र तोकिएको छ ।
साधारण नियमिततर्फ ५ हजार १ सय ७२ छात्र र ४ हजार ७ सय ६२ छात्रा, प्राविधिकतर्फ १ सय ६८ छात्र र ९७ छात्रा तथा ग्रेड वृद्धितर्फ २ सय ८५ विद्यार्थी परीक्षा दिनेछन्।
परीक्षालाई मर्यादित बनाउन ४० जना केन्द्राध्यक्ष, ४८ जना सहायक केन्द्राध्यक्ष, ५ सय ६ जना निरीक्षक, ८८ जना परीक्षा सहायक, १ सय ९५ जना कार्यालय सहयोगी र ६ सय सुरक्षाकर्मी खटाइने छन्।
शिक्षा विकास तथा समन्वय इकाइ प्रमुख विरेन्द्र जंग थापाका अनुसार परीक्षा मर्यादित, अनुशासित र पारदर्शी बनाउन कडा सुरक्षा व्यवस्था गरिएको छ। परीक्षा केन्द्रमा अवाञ्छित गतिविधि हुन नदिन प्रशासन सतर्क रहने र खलल पुर्याउने जो(कोहीलाई कारबाही गरिने चेतावनी उनले दिए।
चैत ७ देखि १८ गतेसम्म सञ्चालन हुने एसईई परीक्षा शान्तिपूर्ण र मर्यादित बनाउन सबै पक्षको सहकार्य आवश्यक रहेको इकाइ प्रमुख थापाले बताए ।
प्रतिक्रिया दिनुहोस !
