परासी : चितुवाले आक्रमण गर्न थालेपछि नवलपरासीको प्रतापपुर र सुस्ता क्षेत्रका स्थानीयहर त्रसित बनेका छन् । शुक्रबार बिहान चितुवाको आक्रमणबाट चारजना घाइते भएपछि स्थानीयहरू त्रसित बन्न थालेका हुन् । आक्रमण गरेर भागेको चितुवा घना केराबारीमा लुकेको आंशका स्थानीयले गरेका छन् ।
सुरुमा चितुवाले स्थानीय टटुहवा पुल नजिकै खेतमा काम गरिरहेका प्रतापपुर गाउँपालिका–६ का ३६ वर्षीय रघुबिर केवटलाई आक्रमण गरेको थियो । त्यसपछि तीन घण्टाको अन्तरलालमा थप तीनजनालाई आक्रमण गरी घाइते बनाएको जिल्ला प्रहरी कार्यालयका सूचना अधिकारी डीएसपी बीरदत्त पन्तले बताए ।
घाइते हुने अन्य तीनजनामा प्रतापपुरकै वडा नम्बर ६ का ३० वर्षीय प्रेम कोइरी, २८ वर्षीय उमालाल कोइरी र सुस्ता गाउँपालिका–५ का २७ वर्षीय महमद मिया रहेका छन् । रघुवीर भने गम्भीर घाइते भएका छन्। उनको ढाड,अनुहार र टाउकोमा चोट लागेको छ। अन्यको हात र खुट्टामा चोट लागेको डीएसपी पन्तले जानकारी दिए ।
घाइते सबैको अवस्था सामान्य रहेको र उपचारपछि फर्केको प्रहरीले जनाएको छ । चितुवा राष्ट्रिय निकुञ्जबाट आएको हुनसक्ने वन कर्मचारीहरूले अनुमान गरेका छन् । नारायणी नदीमा पानी सुकेको र त्यहीबाट आएको हुन सक्ने सुस्ता/प्रतापपुर सब डिभिजन कार्यालयका रेञ्जर चिनबहादुर यादवले बताए ।
‘मानिसलाई आक्रमण गर्ने चितुवा घना केराबारीमा लुकेको हुनसक्ने आशंका छ । प्रहरी र वन कर्मचारीको टीमले खोजी गरिरहेका छौं । फेला परेको छैन , ’रेञ्जर यादवले भने ।
प्रतिक्रिया दिनुहोस !
