हङकङ : हङकङमा जति व्यस्त समय र कामको चाप छ, त्यति नै विलासिता पनि । कामको रफ्तारबाट बचेको समयमा रमाईलो गर्नुपर्छ भन्दै खानपिन र शारीरिक व्यायाममा ध्यान नदिँदा, आर्थिक, सामाजिक, पारिवारिक र मनोवैज्ञानिक तवरले सन्तुष्टि नहुँदा गम्भीर स्वास्थ्य समस्या देखिएको छ ।
उच्च रक्तचाप, हार्ट अट्याक, स्ट्रोक, प्यारालाइसिस, मोटोपन, अटिजमलगायतका स्वास्थ्य समस्याहरू धेरै मात्रामा हङकङेली नेपालीहरूमा देखिने गरेको छ । मनोरञ्जनात्मक कार्यक्रमहरू हप्तै हुने भए पनि स्वास्थ्य समस्या र चेतना विषयक कार्यक्रमहरू कमै हुने गर्दछन् । आयोजित कार्यक्रमहरूमा पनि समुदायका उपस्थिति न्यून रहन्छ ।
सिनियर न्युरोथेरापिस्ट तर्जुना मगरले सिङ्गो नेपाली समुदायकै लागि भनेर एक कार्यक्रमको आयोजना गरिन् । अवारनेस हेल्थ न्युरोथेरापी इभेन्ट (स्वास्थ्य जागरुकता) कार्यक्रम भारतबाट आएका न्युरोथेरापी एक्सपर्ट आचार्य श्रीरामगोपाल दीक्षितले तीन सेसनमा सहभागीहरूलाई न्युरोथेरापी, पहिचान र समाधान विषयक प्राकृतिक चिकित्सकीय विधिको बारेमा जानकारी दिएका थिए । दीक्षितले पहिलो दिन वर्कसप, दोस्रो दिन योगा र अन्तिम दिन रोगको वैज्ञानिक प्राकृतिक पहिचानको बारेमा प्रशिक्षण प्रदान गरे ।
कार्यक्रममा याउचिमोङ डिस्ट्रिक काउन्सिलर अरुणा गुरुङ, जनसम्पर्क समिति भाइस प्रेसिडेन्ट ताहिर खान, लाङघाली कल्याण समाज हङकङ अध्यक्ष नीलम थापामगरलगायत दर्जनभन्दा बढी सघंसंस्थाका प्रतिनिधिहरूको उपस्थिति थियो ।
आयोजक तर्जुना भन्छिन्, ‘यो पहिलो प्रयास हो, खासमा हाम्रो समुदायलाई स्वास्थ्यसम्बन्धी अझ धेरै सचेतना र कार्यक्रमहरूको खाँचो छ । विदेशी भूमिमा पैसा र विलासिताको पछि भाग्दा आफ्नो स्वास्थ्य बिगारिरहेका छौं ।’ आफू, आफ्नो परिवार र समुदायका लागि आगामी दिनमा अझ यस्ता कार्यक्रमहरूको संख्या र सहभागिताको संख्या बढ्न आवश्यक छ ।
प्रतिक्रिया दिनुहोस !
