धरान : खोटाङको साकेला गाउँपालिकाले ३९ करोड ३० लाख ३९ हजार रुपैयाँको बजेट सार्वजनिक गरेको छ । मंगलबार आयोजित १५औं गाउँसभाको नीति तथा कार्यक्रम प्रस्तुत गर्ने क्रममा आगामी आर्थिक वर्ष २०८२÷८३ मा कार्यान्वयन ल्याउने गरी बजेट सार्वजनिक गरिएको पालिका अध्यक्ष रविप्रकाश राईले बताए ।
अध्यक्ष राईले पालिकाले चालुतर्फ २७ करोड ४७ लाख १ हजार रुपैयाँ र पुँजीगततर्फ ११ करोड ८३ लाख ३८ हजार रुपैयाँबराबरको बजेट सभामा पेस गरिएको बताए ।
गाउँपालिका उपाध्यक्ष बिर्सिका राईले आगामी आर्थिक वर्षका लागि बजेट सार्वजनिक गर्नुका साथै नीति तथा कार्यक्रम प्रस्तुत गरेकि थिइन् । प्रस्तुत गरिएको नीति तथा कार्यक्रम र बजेट गाउँपालिकाबाट बहुमतबाट पारित गरिएको छ ।
आगामी आर्थिक वर्षका लागि साकेला गाउँपालिकालाई वित्तीय समानीकरण अनुदानअन्तर्गत ६ करोड ८९ लाख, राजस्व बाँडफाँटबाट ६ करोड ३२ लाख ५६ हजार, सशर्त अनुदानतर्फ १४ करोड ४ लाख, सशर्त अनुदान पुँजीगततर्फ १ करोड ३८ लाख, संघीय सरकार समपूरक अनुदानतर्फ २ करोड २२ लाख, विशेष अनुदान चालुतर्फ १ करोड ५४ लाख रुपैयाँ प्राप्त हुने प्रक्षेपण
गरिएको छ ।
यसैगरी, प्रदेश सरकारबाट वित्तीय समानीकरण अनुदान ५८ लाख ९ हजार, सवारी कर बाँडफाँटबाट ४९ लाख ९० हजार, प्रदेश सशर्त अनुदानतर्फ ७५ लाख ६५ हजार, प्रदेश सरकार पुँजीगततर्फ १ करोड ७२ लाख ५९ हजार, समपूरक अनुदान पुँजीगततर्फ १ करोड ६० लाख, जिल्ला समन्वय समितिबाट साझेदारीबापत १८ लाख, मालपोत कार्यालयबाट घरजग्गा रजिस्ट्रेसन शुल्क बाँडफाँटबापत १ लाख ५० हजार, बाँडफाँटबाट प्राप्त हुने विज्ञापन करबापत १० हजार तथा गाउँपालिकाको प्रक्षेपित राजस्व रकम ३० लाख, आव २०८१/८२ बाट सरेर जाने बैंक मौज्दात १ करोड २५ लाख रुपैयाँ प्रक्षेपित आय अनुमान गरिएको पालिकाका लेखापाल उत्तम आचार्यले बताए ।
साकेला गाउँपालिकाले आगामी आर्थिक वर्ष ०८२/८३ देखि कार्यान्वयन हुने गरी बालबालिका लक्षित ‘नवजात शिशु बचत योजना’ घोषणा गरेको छ । नयाँ नीतिअनुरूप आगामी साउनदेखि गाउँपालिकाभित्र जन्मिने हरेक शिशुको नाममा नेपाल एसबीआई बैंकको सहकार्यमा बैंक खाता खोली रकम जम्मा गर्न सुरु गरिने छ । अब जन्मने बच्चाहरूको नाममा पहिलो वर्ष १० देखि १५ हजार रुपैयाँसम्म खातामा जम्मा गरिने र वार्षिक केही रकम वृद्धि गर्दै लगिने उनको भनाइ छ ।
खाता खोल्नका लागि स्वास्थ्य संस्थामा बच्चा जन्माएको हुनुपर्ने, समयभित्रै जन्मदर्ता गराएको हुनुपर्ने लगायतका न्यूनतम मापदण्ड तयार गरिएको लेखापाल आचार्यले बताए ।
यसरी, खोलिएको खातामा १८ वर्षको उमेर सम्म पालिकाले आन्तरिक आम्दानीको केही हिस्सा रकम वार्षिक रूपमा थप गरी वृद्धि गर्दै लैजाने गरी मापदण्ड तयार गरी लागू गरिने उनले बताए । यसरी जम्मा भएको रकमको हकदार हुन कम्तीमा कक्षा १२ सम्म गाउँपालिकाभित्रकै सामुदायिक विद्यालयमा निरन्तर अध्ययन गरेको हुनुपर्ने, बसाइँ सरी अन्यत्र जान नपाइने लगायतका मापदण्ड तयार गरिएको छ । यस कार्यमार्फत बालबालिकालाई उच्च शिक्षा र समुन्नत जीवनका लागि आधार स्थापित गर्ने प्रमुख नीति लिइएको छ ।
साकेला गाउँपालिकाले व्यक्तिगत र पारिवारिक ऋणका असरहरू कम गरी प्रत्येक शिशुको पालनपोषण, शिक्षा र भविष्यका सम्भावनाहरू सुरक्षित गर्ने विश्वास लिएको छ ।
प्रतिक्रिया दिनुहोस !
