काठमाडौं : नेपाल प्रिमियर लिग (एनपीएल) को फ्रेन्चाइज टोली चितवन राइनोजको ‘आइकोनिक प्लेयर’मा सौगत ढकाल चयन भएका छन् । चितवनले आयोजना गरेको ट्यालेन्ट हन्टबाट राइट आर्म लेग स्पिनर सौगत ‘आइकोनिक प्लेयर’ घोषित भएका हुन् ।
चितवनले हेटौंडा, टाँडी र भरतपुरमा ट्यालेन्ट हन्ट कार्यक्रम सञ्चालन गरेको थियो । खेलाडीको अन्तिम छनोट भने गौतम बुद्ध रंगशालास्थित नमुना क्रिकेट मैदानमा गरिएको थियो । छनोट समितिको विस्तृत मूल्यांकनपछि सौगत ‘आइकोनिक प्लेयर’ घोषित भएका हुन् । यस्तै राइट आर्म फास्ट बलर सक्रिय कार्की र लेफ्ट–आर्म फास्ट बलर नरेश प्रधान डेभलपमेन्ट टिममा चयन भएका छन् ।
ट्यालेन्ट हन्टले नेपालको विभिन्न स्थानबाट उदाउँदो प्रतिभालाई पहिचान र प्रोत्साहन गर्ने उद्देश्य बोकेको थियो । चितवन राइनोजले यसलाई घरेलु क्रिकेट विकास र भविष्यका स्टार खेलाडी तयार पार्ने दीर्घकालीन योजनाको हिस्साका रूपमा लिएको अध्यक्ष आयुष न्यौपानेले बताए ।
‘ट्यालेन्ट हन्ट कार्यक्रमले फेरि प्रमाणित गरेको छ कि नेपालमा क्रिकेट खेलप्रति असाधारण क्षमता र रुचि छ । हामी यस्ता खेलाडीहरूलाई राष्ट्रिय तथा अन्तर्राष्ट्रिय स्तरमा खेल्ने अवसर दिलाउने लक्ष्यका साथ अघि बढिरहेका छौं’, अध्यक्ष न्यौपानेले भने । उनले देशभरका युवालाई खेलमार्फत सशक्त बनाउने र ग्रासरुट स्तरदेखि क्रिकेटको विकासमा योगदान दिने प्रतिबद्धता पनि व्यक्त गरेका छन् ।
प्रतिक्रिया दिनुहोस !
