नतिजा दोहोर्‍याउने कसरतमा सापकोटा, हारको बदला लिने दाउमा नेपाल

सिन्धुपाल्चोक : फागुन २१ मा हुने प्रतिनिधिसभा चुनावको मिति नजिकिँदै गर्दा सिन्धुपाल्चोकमा चुनावी सरगर्मी बढ्दो छ । राजनीतिक पार्टी, नेता–कार्यकर्ता र उम्मेदवारहरू चुनाव केन्द्रित प्रचारप्रसारमा घरदैलो कार्यक्रममा व्यस्त छन् । कसरी हुन्छ आफ्नो पक्षमा जनमत बटुल्नेमा यतिबेला राजनीतिक पार्टीहरू प्रयासरत देखिन्छन् । 

उत्तरी चीनतर्फ सीमा जोडिएको सिन्धुपाल्चोकमा पनि चुनावी रौनक राम्रै लागेको छ । दुईवटा निर्वाचन क्षेत्र रहेको यस जिल्लाको खास निर्वाचन क्षेत्र नम्बर–१ लाई तीन प्रमुख राजनीतिक पार्टीहरू नेकपा एमाले, नेपाली कम्युनिष्ट पार्टी र नेपाली कांग्रेसले निकै महत्वका साथ हेरिरहेका छन् । यसको खास कारण भने केन्द्रीय राजनीतिमा ‘हेभिवेट’ मानिएका नेता अग्निप्रसाद सापकोटा र जिल्लामा राम्रो प्रभाव जमाएका मोहन बस्नेत नै हुन् ।

यस पटक प्रतिनिधिसभा निर्वाचनका लागि सिन्धुपाल्चोक–१ बाट ३ जना स्वतन्त्रसहित कुल १८ जना उम्मेदवार चुनावी मैदानमा छन् । नेकपाले यसअघिकै उम्मेदवार माधव सापकोटालाई चुनावी मैदानमा उतारेको छ भने एमालेले पनि पुरानै उम्मेदवार सरेश नेपाललाई पुनः मौका दिएको छ । नेपाली कांग्रेसले जंगबहादुर लामालाई सिन्धुपाल्चोक– १ बाट उठाउँदै गर्दा राष्ट्रिय स्वतन्त्र पार्टीले भरतप्रसाद पराजुलीलाई टिकट दिएको छ । 

पराजुली स्वतन्त्र ऊर्जा उत्पादकहरूको संस्था नेपाल (इप्पान) का केन्द्रीय सदस्य एवं एकीकृत व्यापार कम्पनी तथा ब्रम्हायणी हाइड्रो पावरका अध्यक्ष हुन् । स्थानीय व्यवसायीको उम्मेदवारीले ठूला तीन राजनीतिक दलका उम्मेदवारलाई राम्रै चुनौती हुने देखिएको छ । तथापि, स्थापित र अनुभवी राजनीतिक पार्टीका उम्मेदवारहरूसँग प्रतिष्पर्धा गर्नु पराजुलीका लागि उति सहज भने छैन । 

यसैगरी, राष्ट्रिय प्रजातन्त्र पार्टी (राप्रपा) बाट हलो चुनाव चिह्न लिएर राममणि न्यौपाने उठेका छन् भने नेपाल मजदुर किसान पार्टी (नेमकिपा), राष्ट्रिय जनमोर्चादेखि मंगोल नेशनल अर्गनाइजेशनलगायत हर्क साम्पाङ नेतृत्वको श्रम संस्कृति पार्टी र पूर्व ऊर्जामन्त्री कुलमान घिसिङ नेतृत्वको उज्यालो नेपाल पार्टीका उम्मेदवार समेत प्रतिनिधिसभा निर्वाचन, २०८२ को चुनावी मैदानको प्रतिष्पर्धामा छन् । 

यसअघि प्रतिनिधिसभा निर्वाचन, २०७९ मा सिन्धुपाल्चोक–१ बाट तत्कालीन नेकपा माओवादी केन्द्रका तर्फबाट माधव सापकोटा निर्वाचित भएका थिए । सापकोटाले एमालेका उम्मेदवार सरेश नेपाललाई ३ हजार ३ सय ४२ मतान्तरले पराजित गरेका थिए । सापकोटाले ३० हजार ४ सय ८ मत ल्याउँदा नेपालले २७ हजार ६६ मत प्राप्त गरेका थिए । 

२०७९ सालमा पहिलो र दोस्रो भएका सापकोटा र नेपाल फेरि पनि चुनावी प्रतिष्पर्धामा आमनेसामने भएका छन् । अर्थात् नेकपाले सापकोटालाई नै फेरि सिन्धुपाल्चोक–१ बाट टिकट दिँदै गर्दा एमालेले पनि पहिलेकै प्रतिष्पर्धी नेपाललाई सापकोटाविरुद्ध उतारेको छ । केन्द्रीय राजनीति र जिल्लामा राम्रै प्रभाव रहेका काका अग्निप्रसाद सापकोटाका कारण पनि यसको सहजता सापकोटालाई छ । 

यद्यपि, नेकपाको युवा नेता सापकोटा पार्टीको खास सम्भावना भएको नेतामा गनिने मात्र होइन, जिल्लाको विकास र सरोकारका विषयमा राम्रैसँग दख्खल राख्ने व्यक्तिको रूपमा जिल्लावासीहरूले चिनेका छन् । खासगरी पछिल्लो पटक सापकोटाले संसदमा देखाएको उपस्थितिले उनलाई राम्रै चिनाएको छ । यसको सफलतालाई समेत राम्रैसँग ‘क्यास’ गर्दै पुनः विजय भएर संसद छिर्ने कसरतमा सापकोटा देखिन्छन् । तर, एमालेका उम्मेदवार सरेश नेपाल यस पटक जसरी पनि सापकोटाको विजय यात्रालाई ‘ब्रेक’ लगाउने तयारीमा छन् । 

यसअघि जम्मा ३ हजार ३ सय ४२ मतले मात्र पराजित हुन पुगेका नेपाल यस पटक प्रमुख पार्टीहरू छुट्टाछुट्टै चुनावी मैदानमा रहेकाले पनि आफ्नो जीत सुनिश्चित रहेको दावी गर्छन् । अघिल्लो पटकको निर्वाचनमा नेकपा माओवादी केन्द्र र नेपाली कांग्रेसबीच चुनावी गठबन्धन भएको थियो ।

निर्वाचन क्षेत्र नम्बर २ कांग्रेसलाई दिएर १ रोजेको माओवादीले कांग्रेसको समर्थनमा एमालेका उम्मेदवारलाई हराएको थियो, जुन हारको बदला यसपटक सापकोटासँग लिने दाउमा नेपाल देखिन्छन् । एमालेका प्रभावशाली स्थानीय नेता नेपाल २०७४ सालको प्रदेशसभा सदस्यमा सिन्धुपाल्चोक १ (ख) बाट निर्वाचित भएका थिए । उनी २२ हजार ८ सय ३७ मतका साथ विजयी हुँदा नेपाली कांग्रेसका उम्मेदवार राजेन्द्रकुमार श्रेष्ठ १२ हजार १ सय ८७ मतसहित पराजित भएका थिए । 

नतिजा फर्काउने दाउमा कांग्रेस
सिन्धुपाल्चोक– १ बाट २०७० सालयता नेपाली कांग्रेसले सांसद पाएको छैन । २०६४ सालयता यस क्षेत्रबाट नेकपा माओवादीले प्रभाव जमाएकाले यसको असर कांग्रेस र एमालेलाई नै परेको छ । तर, दोस्रो संविधानसभा निर्वाचन २०७० मा भने एक्लाएक्लै चुनावी प्रतिस्पर्धामा जाँदा यस क्षेत्रबाट कांग्रेसका पुरानै नेता मोहनबहादुर बस्नेतले बाजी मारेका थिए । 

२०५६ सालमा यसै क्षेत्रबाट जितेका बस्नेतले २०७० सालमा पनि निर्वाचन जितेका थिए । २०७९ सालमा माओवादीसँगको गठबन्धनमा यो क्षेत्र छोडेर क्षेत्र नम्बर २ मा गएका थिए बस्नेत । अहिले यस क्षेत्रबाट कांग्रेसले जंगबहादुर लामालाई उठाएको छ । नेपाली कांग्रेसको नेतृत्व फेरिएसँगै सिन्धुपाल्चोक– १ मा पार्टीले नयाँ अनुहारलाई उतारेको छ ।

प्रदेशसभा, राष्ट्रियसभामा अहिलेसम्म उम्मेदवार नबनेका उम्मेदवार लाई उठाएको कांग्रेसले यस क्षेत्रबाट २०७० सालयताको शून्यतालाई तोड्ने तयारी गरिरहेको छ । तर, यसमा पुराना अनुभवी र प्रभावशाली कम्युनिष्ट उम्मेदवारसँगै नयाँ शक्तिको रूपमा उदाएको रास्वपाको उम्मेदवारसँग राम्रै प्रतिष्पर्धा गर्नुपर्ने देखिन्छ ।