मोरङका सबै मतदानस्थलमा निर्वाचन सामग्रीसहित पुगे कर्मचारी र सुरक्षाकर्मी

विराटनगर : प्रतिनिधिसभा सदस्य निर्वाचन सम्पन्न गराउन मोरङका सबै मतदानस्थल र मतदान केन्द्रमा कर्मचारी तथा सुरक्षाकर्मी पुगिसकेका छन् ।निर्वाचन अधिकृत र मुख्य निर्वाचन अधिकृतको कार्यालयबाट आवश्यक सामग्री जिम्मा लगाएर कर्मचारी र सुरक्षाकर्मीलाई मतदान केन्द्रमा खटाइएको हो । 

मतदान प्रक्रिया सञ्चालनका लागि आवश्यक प्राविधिक तथा प्रशासनिक तयारी अन्तिम चरणमा पुगेको मुख्य निर्वाचन अधिकृत चित्रबहादुर गुरुङले बताए । उनका अनुसार मोरङमा कुल ३ सय ६ वटा मतदानस्थल र ८ सय ८८ वटा मतदान केन्द्र तोकिएका छन् । 

सबै केन्द्रमा निर्वाचन सामग्री सुरक्षित रूपमा पुर्‍याइसकिएको जानकारी गुरुङले दिए । उनका अनुसार मतपत्र मुख्य निर्वाचन अधिकृतको कार्यालयबाट वितरण गरिएको छ भने अन्य ५२ प्रकारका निर्वाचन सामग्री सम्बन्धित निर्वाचन अधिकृतको कार्यालयमार्फत मतदान अधिकृतलाई हस्तान्तरण गरिएको हो । मतपेटिका, सुरक्षण सिल, स्वस्तिक छाप, मतदाता नामावली, फाराम, अभिलेख सामग्री लगायत  सबै आवश्यक उपकरण सम्बन्धित केन्द्रमा पुगिसकेको उनले बताए । 

निर्वाचन सम्पन्न गर्नका लागि मोरङमा ८ सय ८८ जना मतदान अधिकृत र त्यत्तिकै संख्यामा सहायक मतदान अधिकृत खटाइएको छ । त्यसबाहेक ५ हजार ३ सय ४६ जना अन्य कर्मचारी परिचालन गरिएको छ । प्रत्येक मतदान केन्द्रमा आवश्यक कर्मचारी व्यवस्थापन गरिएकाले मतदान प्रक्रिया सुचारु र व्यवस्थित रूपमा सञ्चालन हुने विश्वास लिइएको छ ।

प्रत्येक निर्वाचन क्षेत्रमा दुई–दुई जनाका दरले सहसचिव र उपसचिव स्तरका कर्मचारीको नेतृत्वमा घुम्ती टोली परिचालन गरिएको छ । मोरङका ६ वटै निर्वाचन क्षेत्रमा गरी १२ सदस्यीय घुम्ती टोली सक्रिय रहनेछ । टोलीले मतदानको दिन कुनै समस्या उत्पन्न भएमा तत्काल अनुगमन, समन्वय र समाधानको काम गर्नेछ । सुरक्षाकर्मीहरू पनि मतदानस्थलमा तैनाथ भइसकेको र संवेदनशील क्षेत्रमा विशेष निगरानी बढाइएको मोरङ प्रहरी प्रमुख एसपी कवित कटवालले बताए ।  

यसपटक मोरङमा प्रतिनिधिसभातर्फ १ सय १० जना उम्मेदवार चुनावी प्रतिस्पर्धामा छन् । मैदानमा उत्रिएका उम्मेदवारको राजनीतिक भविष्य निर्धारण गर्न जिल्लाका ७ लाख ८३ हजार ५० जना मतदाता मतदान प्रक्रियामा सहभागी हुनेछन् । निर्वाचन आयोगले मतदातालाई निर्धक्क भएर मतदानमा सहभागी हुन आह्वान गरेको छ ।

मतदान बिहीबार हुने छ । कर्मचारीहरू सम्बन्धित केन्द्रमा पुगेर मतदानस्थल व्यवस्थापन, मतदान कक्ष निर्माण, संकेतचिन्ह टाँस्ने, मतपेटिका जाँच गर्ने लगायतका पूर्वतयारीमा जुटिसकेका छन् । साथै, अन्तिम समन्वय बैठक र सुरक्षा परीक्षण सम्पन्न गरी निर्वाचनलाई शान्तिपूर्ण, निष्पक्ष र व्यवस्थित रूपमा सम्पन्न गरिने तयारी रहेको मोरङका प्रमुख जिल्ला अधिकारी युवराज कटेलले बताए । अब मतदाताको सहभागिता र शान्तिपूर्ण मतदान नै निर्वाचनको सफलताको मुख्य आधार हुने उनको भनाइ छ ।