काभ्रे : निर्माणाधीन अरनिको राजमार्ग अन्तर्गत साँगा–धुलिखेल सडक खण्डको बिहीबार अनुगमन गरिएको छ । जिल्ला समन्वय समिति काभ्रेका प्रमुख दीपक गौतम तथा प्रमुख जिल्ला अधिकारी गोपाल अधिकारीसहितको टोलीले उक्त सडक खण्डको स्थलगत निरीक्षण गर्दै निर्माण प्रगतिबारे जानकारी लिएका हुन् ।
अनुगमनका क्रममा टोलीले सडक विस्तार, कालोपत्रे, नाली व्यवस्थापनलगायतका कार्यको अवस्थाबारे अवलोकन गर्नुका साथै निर्माण कार्यमा देखिएका ढिलाइ र समस्याबारे सरोकारवाला निकायसँग छलफल गरेको थियो । समयमै गुणस्तरीय निर्माण सम्पन्न गर्न सम्बन्धित निकायलाई निर्देशन समेत दिइएको छ ।
सडक निर्माणको काम तीव्र पार्न, यात्रु तथा सवारी साधनलाई सहज आवागमन सुनिश्चित गर्न र सम्भावित जोखिम न्यूनीकरणका उपाय अपनाउन जोड दिइएको छ । स्थानीयवासीले भने निर्माण कार्य सुस्त हुँदा दैनिक आवागमनमा समस्या भोग्नुपरेको गुनासो गरेका छन् । बिहान दिउँसोको समयमा धुलो उडेर निकै समस्या भएको स्थानीय सूर्यबहादुर जोशीले बताए । निर्माण पक्षले ध्यान नदिँदा सर्वसाधारणलाई स्वास्थ्यमा समस्या देखिएको उनले बताए । साँगा–धुलिखेल सडक खण्डको स्तरोन्नतिले काभ्रे जिल्लासँगै पूर्वी क्षेत्रको यातायात व्यवस्थापनमा सहजता ल्याउने अपेक्षा गरिएको छ ।
प्रतिक्रिया दिनुहोस !
