जेनजी आन्दोलनका बेला भागेका १७२ कैदीबन्दी अझै भेटिएनन्, भारतीयलाई पक्रिन चुनौती

परासी : नवलपरासी कारागारबाट भागेकामध्ये अझै १७२ जना कैदीबन्दी प्रहरीको फरार सूचीमै छन् । भदौ २३ र २४ गते भएको जेनजी आन्दोलनअन्तर्गत भदौ २५ गते कारागारमा आगजनी र सुरक्षार्थ खटिएका सशस्त्र र नेपाल प्रहरीका सुरक्षाकर्मीलाई नियन्त्रणमा लिएर उनीहरु भागेका थिए । ५४६ जना भागेकामध्ये प्रहरीले पक्राउ गरेर तथा आफै सम्पर्क गरेर आउनेको संख्या ३७४ जना रहेको कारागार कार्यालय परासीका प्रमुख सुवोध महतोले जानकारी दिए ।  

भारतीय कैदीबन्दीलाई पक्राउ गर्न समस्या
 कारागारबाट भागेका ४१ जना भारतीय नागरिकका कैदीबन्दीमध्ये हालसम्म तीन जनालाई मात्र  रुपन्देही र नवलपरासीका सीमा नाकाबाट प्रहरीले पक्राउ गरी बुझाएको छ । बाँकी फरार सूचीमै छन् । नेपाली कैदीबन्दीहरु कुनै न कुनै समय नेपालबाटै पक्राउ पर्न सक्ने सम्भावना रहे पनि भारतीय नागरिकलाई पक्राउ गर्न चुनौतीपूर्ण देखिएको छ । ‘भारत वा अन्य स्थानमा लुकेर बसेका नेपालीहरु आफ्नै देश फर्किने सम्भावना हुन्छ, तर भारतीयहरु भने नेपालमा नआए पनि हुने भएकाले पक्राउ पर्ने सम्भावना कम छ’, एक प्रहरी अधिकृतले भने । 

भागेका कैदीबन्दीहरु अहिले सीमावर्ती भारतीय बजार र गाउँमा खुलेआम घुम्ने गरेको त्यहाँका स्थानीयहरुले बताएका छन् । यसैबीच नेपालमा अपराध गरी कारागारमा रहेका भारतीय नागरिकलाई पक्राउ गरेर पठाउनका लागि जिल्लासँग सीमाना जोडिएको भारतको उत्तर प्रदेश (युपी) स्थित महाराजगञ्ज जिल्ला र बिहारस्थित पश्चिम चम्पारनकाका एसपीसहित त्यहाँका सीमा सुरक्षाकर्मीलाई लिस्ट पठाएर समन्वय गर्दै आएको तत्कालीन प्रहरी प्रमुखले बताउँदै आएका थिए । 

तर अहिले सरुवा भइ आएका प्रहरी प्रमुख (एसपी) रामबहादुर जिसीले भने आफू आएपछि त्यस विषयमा कुनै अपडेट नभएको बताए । ‘पहिलाका एसपी साहेबहरुले समन्वय गर्नुभएको होला । म भर्खर आएकाले त्यसबारे अपडेट छैन । बुझेर खबर गरौंला । ’ एसपी केसीले भने ।