सुतिरहेका बेला पहिरोले घर पुर्दा तीन वर्षीय बालकको मृत्यु, बाबु–आमा घाइते

मुगु : मुगुम कार्मारोङ गाउँपालिका–५ पालिका केन्द्र रहेको पुलु बजारमा पहिरोले घर पुरिँदा तीन वर्षीय बालकको मृत्यु भएको छ । शुक्रबार बिहान करिब ४ बजे स्थानीय पेमा लामाको घरमा भाडामा होटल सञ्चालन गर्दै आएका छायाँनाथ रारा नगरपालिका–१३ तिर्पका ३२ वर्षीय जगनाथ बडुवाल, उनकी २७ वर्षीया श्रीमती सिर्जना बडुवाल र तीन वर्षीय छोरा रमेश बडुवाल सुतिरहेको अवस्थामा माथिबाट ढुङ्गासहितको पहिरो खस्दा मृत्यु भएको हो ।

पहिरोमा परी जगनाथ र सिर्जनालाई सामान्य चोट लागेको छ । उनीहरूले पुलु स्वास्थ्य चौकीमा उपचार गराइरहेका छन् । पहिरोमा पुरिएका बालक रमेशलाई प्रहरी र स्थानीयवासीले उद्धार गरी उपचारका लागि स्वास्थ्य चौकी पुर्‍याए पनि चिकित्सकले बिहान करिब ५ः४५ बजे मृत घोषणा गरेका थिए ।करिव २ सय मिटर माथिबाट आएको पहिरोले घरमा पूर्ण क्षति पुगेको छ ।

घटनास्थल आसपासका थप आठ घर समेत जोखिममा रहेकाले ती घरमा बस्दै आएका स्थानीयलाई सुरक्षित स्थानमा सारिएको जिल्ला प्रहरी कार्यालयका प्रहरी नायव उपरीक्षक रबीराज थपलियाले बताए । .उक्त स्थानमा उद्धारका लागि जिल्ला प्रहरी कार्यालयबाट प्रहरी निरीक्षक पदमबहादुर खत्रीको  कमाण्डमा ७ जनासहित छायल प्रहरी चौकीबाट ६ जनाको टोली घटनास्थलतर्फ हिंडेको छ भने पुलुमा रहेका प्रहरी र स्थानीयले  अहिले उद्धार गरिरहेको प्रहरीले जानकारी गराएको छ ।