त्रिशूली: नेपालबाट चीन प्रवेश गर्ने दोस्रो ठूलो रसुवागढी नाकालाई मध्यनजर गर्दै भोटोकोसी नदी किनारमा सुक्खा बन्दरगाह निर्माण प्रक्रिया सुरु भएको छ।
सदरमुकाम धुन्चेदेखि २६ किलोमिटर दूरीमा रहेको टिमुरे गाविसको टिमुरेमा सुक्खा बन्दरगाह निर्माण प्रक्रिया सुरु भएको रसुवा प्रशासनले जानकारी दिएको छ।
केरुङ नजिकै निर्माण हुन लागेको सुक्खा बन्दरगाहको जग्गा अधिग्रहणको काम सकिएको छ। हाल मुआब्जा वितरणको तयारी भएको रसुवाका प्रमुख जिल्ला अधिकारी कृष्णप्रसाद अधिकारीले जानकारी दिए।
उनका अनुसार सुक्खा बन्दरगाह बनाउन टिमुरे गाविसको जग्गा अधिग्रहण गर्ने कार्य सम्पन्न भई मुआब्जा वितरणको तयारी भइरहेको छ। वाणिज्य मन्त्रालयले रकम उपलब्ध गराएपछि मुआब्जा वितरण हुनेछ।
सुक्खा बन्दरगाहका लागि प्रयोग गरिने ५९ रोपनी जग्गाको मुआब्जा स्थानीय बासिन्दाले प्राप्त गर्ने भएका छन्। जग्गा प्राप्ति ऐन अन्तर्गत सडकले छोएका जग्गाको ६ लाख रुपैयाँ पाउने भएका छन्।
स्याप्रुबे सी-रसुवागढी सडक मार्गले नछोएका भित्री जग्गाको चार लाख प्रतिआना मुआब्जा निर्धारण गर्ने कार्य सम्पन्न भई वितरण गर्नुपर्ने ४८ करोड रुपैयाँ रकम निकासाका लागि अर्थ मन्त्रालयमा सिफारिस भइसकेको छ। मुआब्जा पाउनुपर्नेमा ५२ स्थानीयवासीलगायत छन्।
रसुवाको टिमुरे क्षेत्रको तल्लो तटीय प्रहरी जाँच चौकीको सेरोफेरोदेखि लाङटाङ राष्ट्रिय निकुञ्जसम्म भोटेकोसी नदी आसपास क्षेत्रमा सडकभन्दा पश्चिम भागमा बन्दरगाह बन्ने बताइएको छ। बन्दरगाह काठमाडौंदेखि एक सय ५० किलोमिटर दूरिमा छ।
यस्तै ६८ करोडको लागतमा निर्माण हुने रसुवागढी एकीकृत भवनको बोलपत्र प्रक्रिया अन्तिम चरणमा पुगेको छ। रसुवा भन्सार कार्यालय टिमुरेका प्रमुख भन्सार अधिकृत केदार पनेरुका अनुसार एकीकृत भवनमा भन्सार, अध्यागमन, क्वारेनटाइन कार्यालय, बैंक र सुरक्षा समेतका निकाय रहनेछन्।
प्रतिक्रिया दिनुहोस !
