विराटनगरः इटहरीबाट विराटनगरतर्फ आउँदै गरेको बसको ठक्करबाट विराटनगरमा मंगलबार दिउँसो दुई जनाको मृत्यु भएको छ । बसको ठक्करबाट मृत्यु हुने पति-पत्नी भएको प्रहरीले जानकारी दिएको छ ।
को १ ख ४३२६ नम्बरको बसले ठक्करले विपरित दिशातर्फ जाँदै गरेको को २५ प ३९३९ नम्बरको मोटरसाइकलका चालक मोरङको तेतरिया ३ का ४० वर्षीय तुलाराम थारु र उनकी पत्नी ४० वर्षीय सीताकुमारी चौधरीको मृत्यु भएको मोरङ प्रहरी प्रवक्ता डीएसपी योगेन्द्रसिंह थापाले जानकारी दिए ।
विराटनगर ५ खार्जी चौकमा भएको दुर्घटनामा परेर गम्भीर घाइते भएका दुवैको उपचारका क्रममा विराटनगर स्थित नोबेल मेडिकल कलेजमा मृत्यु भएको हो ।
तुलारामको दिउँसो १:३० बजे र सीताकुमारीको दिउँसो २:३० बजे मृत्यु भएको प्रहरीले जनाएको छ । ठक्कर दिने बस र चालकलाई नियन्त्रणमा लिएर घटनाको अनुसन्धान सुरु गरिएको जिल्ला प्रहरी कार्यालय मोरङले जनाएको छ ।
त्यस्तै, झापाको दमकबाट यात्रु लिएर पाँचथरको पञ्चमी बजारतर्फ जाँदै गरेको बलेरो जीप मोरङको याङ्शीलामा मंगलबार दुर्घटना हुँदा १० यात्रु घाइते भएका छन् । घाइते मध्ये तीन जनाको अवस्था गम्भीर छ ।
गम्भीर अवस्थाका पाँचथरको करुम्वा १ की जानुका सेन्चुरी, करुणा लावती र राजेन्द्र लिम्बूलाई उपचारका लागि विराटनगर स्थित विराट नर्सिङ होम ल्याइएको डीएसपी थापाले बताए ।
थापाका अनुसार १३ जना यात्रु बोकेर पाँचथरतफै जाँदै गरेको मे १ ज १२२९ नम्बरको जीप याङ्शीला ९ स्थित लेटाङ-बुधबारे सडक खण्डमा दुर्घटनामा परेको हो । दुर्घटनाको कारण खुलिसकेको छैन ।
दुर्घटनामा परेका मध्ये पाँचथर कुरुम्बा १ का अजय सेन्चुरी, कुशल राई, लिम्बा-८ का समटा तामाङ, इलाम साक्फारा ७ की सुमित्रा राई, ईभाङकी कमला राई, झापा दमक १ की सानु लिम्बु र धुलाबारी ३ का चैतु राजवंशीको अवस्था सामान्य रहेको प्रहरीले जनाएको छ । उनीहरुको विराट नर्सिङ होम र झापाको दमक स्थित नमस्ते हस्पिटलमा उपचार भइरहेको छ । दुर्घटनामा परेको जीप नियन्त्रणमा लिए पनि चालक फरार रछन् । प्रहरीले चालकको खोजी भइरहेको जनाएको छ ।
प्रतिक्रिया दिनुहोस !
