एजेन्सीः युरोकपमा ऐतिहासिक यात्रा तय गरिरहेको पोल्यान्डले शुक्रबार बिहान हुने क्वार्टरफाइनलमा पोर्चुगललाई पराजित गर्न सके अर्को कोसेढुंगा पार गर्नेछ ।
दुवै टोलीको विशेषता भनेको दुवैलाई एउटा स्टार स्ट्राइकरको साथ छ । तर पोर्चुगिज टोलीलाई विश्व फुटबलमा नाम चलेका अन्य केही खेलाडीको पनि साथ छ । पोल्यान्डमा भने रोबर्ट लेवान्डोस्कीबाहेक अन्य खेलाडी त्यति चर्चित छैनन् ।
युरोपियन क्लब फुटबलमा उत्कृष्ट प्रदर्शन गरिरहेका लेवान्डोस्की पोल्यान्डलाई ऐतिहासिक सफलता दिलाउने प्रयासमा छन् । तीन पटकका फिफा वर्ष खेलाडी क्रिस्टियानो रोनाल्डोले पोर्चुगलका लागि उपाधि जित्न सकेका छैनन् ।
लेवान्डोस्की र रोनाल्डो दुवै राष्ट्रिय टोलीका कप्तान हुन् । लेवान्डोस्की युरोकप छनोटमा १३ गोलसहित सर्वाधिक गोलकर्ता बनेका थिए । रोनाल्डोले यो सिजन आफ्नो क्लब रियल म्याड्रिडलाई युरोपियन च्याम्पियन्स लिगको उपाधि पनि जिताएका थिए ।
त्यसैले यी दुई टोलीबीचको भिडन्तलाई उदाउँदो शक्ति र संघर्ष गरिरहेको शक्तिबीचको लडाइँका रूपमा हेरिएको छ, जहाँ दुवै टोली एकएकजना स्टार खेलाडीको साथमा अगाडि बढ्दैछन् ।
पोल्यान्डले जारी प्रतियोगितामा उत्कृष्ट प्रदर्शन गरिरहे पनि लेवान्डोस्कीले लय समाउन सकेका छैनन् । उनको नाममा एउटा पनि गोल छैन । तर पोल्यान्डको टिम गेम राम्रो छ । समूहगत चरणमा विश्व च्याम्पियन जर्मनीसँग बराबरी खेलेको पोल्यान्डले अन्य दुई खेलमा जित हात पारेको थियो ।
पोल्यान्डले प्रिक्वार्टरफाइनलमा सशक्त प्रदर्शन गरिरहेको स्विट्जरल्यान्डलाई टाइब्रेकरमा हराएको थियो । सन् २००८ मा पहिलोपटक युरोकप खेलेको पोल्यान्डले यसअघिका संस्करणमा समूहगत चरण पार गर्न सकेको थिएन । पोर्चुगलको यात्रा पोल्यान्डको भन्दा बढी संघर्षपूर्ण रहेको छ ।
समूहगत चरणमा तीनवटै खेल बराबरी खेलेको पोर्चुगलले नकआउट चरणमा बलियो टोली क्रोएसियालाई अतिरिक्त समयमा १–० गोलले हराएको थियो । समूहगत चरणको अन्तिम खेलमा हंगेरीविरुद्ध ३–३ गोलको बराबरी खेलेपछि पोर्चुगलले अघिल्लो चरणको यात्रा तय गरेको थियो । समूहगत चरणको आफ्नो अन्तिम खेलमा तीनपटक पछि परेको पोर्चुगलका लागि रोनाल्डोले दुई गोल गरेका थिए ।
रोनाल्डोको प्रदर्शन क्रमशः प्रभावशाली बन्दै गएको छ । नकआउट चरणमा प्राप्त जितमा पनि रोनाल्डोले नै मुभ बनाएका थिए । त्यैपनि रोनाल्डोले आफूस्तरको प्रदर्शन भने गर्न सकेका छैनन् । क्रोएसियाविरुद्ध उनले निर्धारित ९० मिनेट समयमा एउटा पनि गतिलो आक्रमण गर्न सकेनन् ।
अनुभवी विंगर रिकार्डो क्वारेस्मा र १८ वर्षीय स्ट्राइकर रेनाटो सान्तोष यतिबेला पोर्चुगल टोलीको आकर्षण बन्दैछन् । क्रोएसियाविरुद्ध दोस्रो हाफमा मैदान प्रवेश गरेका सान्चेज प्लेयर अफ दि म्याच घोषित भएका थिए । क्वारेस्मालाई पनि दोस्रो हाफमा मैदान छिराइएको थियो ।
पोल्यान्डले जारी प्रतियोगितामा चार खेल खेल्ने क्रममा केवल तीन गोल गरेको छ । फियोरेन्टिनाका मिडफिल्डर ज्याकुब ब्लाजिकोस्कीले दुई गोल गरेका छन् ।
आयाक्सका स्ट्राइकर अर्काडियुज मिलिचले पनि एक गोल गरेका छन् । ३० अन्तर्राष्ट्रिय खेलमा ११ गोल गरिसकेका मिलिच र ८३ अन्तर्राष्ट्रिय खेलमा १८ गोल गरेका ब्लाजिकोस्की लयमा छन् । पोल्यान्डको रक्षापंक्ति बलियो छ ।
पोर्चुगलले सन् १९९६ यताका हरेक युरोकप संस्करणमा कम्तीमा क्वार्टरफाइनल यात्रा तय गरेको छ । यसक्रममा उसले एकपटक फाइनल, दुईपटक सेमिफाइनल र तीनपटक क्वार्टरफाइनलको यात्रा तय गरेको थियो ।
सन् १९८४ को संस्करणमा पनि सेमिफाइनलसम्म पुगेको पोर्चुगललाई पुनः यो प्रतियोगितामा सहभागिता जनाउन १२ वर्ष लागेको थियो । पछिल्लो तथ्यलाई हेर्ने हो भने पोर्चुगल सन् २०१२ को युरोकपमा पनि सेमिफाइनलसम्म पुगेको थियो ।
पोर्चुगल र पोल्यान्डबीच विगतमा भएको भिडन्तलाई हेर्ने हो भने लगभग दुवैको स्थिति एउटै छ । हालसम्म यी दुई टोलीबीच भएका १० भिडन्तमा पोर्चुगलले चार जित र पोल्यान्डले तीन जितको नतिजा निकालेका छन् । तीन खेल भने बराबरीमा सकिएका छन् ।
यी दुई टोलीबीच भएका पछिल्ला दुई भिडन्तको नतिजा बराबरीमा टुंगिएको थियो । चार वर्षपछि यी दुई टोली आमनेसामने हुन लागेका हुन् ।
पोल्यान्डका समर्थकले पनि आफ्ना प्रभावशाली खेलाडी लेवान्डोस्कीबाट निकै आशा गरेका छन् । सन् २०१२-१३ को युरोपियन च्याम्पियन्स लिगको सेमिफाइनलको पहिलो लेगमा रोनाल्डोको क्लब रियल म्याड्रिडलाई ४–१ गोलले हराउँदा बोरुसिया डर्टमन्डका स्ट्राइकर लेवान्डोस्की एक्लैले चार गोल गरेका थिए ।
प्रतिक्रिया दिनुहोस !
