राहतको चामल बिक्री गरेपछि‍...

चैनपुर: बंगलादेश सरकारले गत वर्षको भूकम्पपीडितका लागि राहतस्वरूप पठाएको चामल बझाङमा बिक्रीका लागि राखिएको छ । खाद्य संस्थानमार्फत बझाङ पठाएको बंगलादेशी उसिना चामल बझाङको सीमखेत खाद्य संस्थानको गोदाममा बिक्रीका लागि राखिएको फेला परेको हो ।

अरुवा मोटो चामल बेच्दै आएको खाद्य संस्थानले बंगलादेशी उसिना चामल पठाएपछि यहाँ उक्त चामल खान उपयुक्त नभएको भन्दै उपभोक्ताले खरिद गरेका छैनन् । क्षेत्रीय खाद्य संस्थान धनगढीले असारमा पठाएको तीन सय १० क्विन्टल बंगलादेशी चामलमध्ये अहिलेसम्म २०–२५ किलोभन्दा बढी बिक्री नभएको खाद्य संस्थान सीमखेतका प्रमुख ईश्वरीदत्त पाण्डेले जानकारी दिए ।

'भूकम्पपीडितका लागि विदेशबाट आएको यो चामल कति समय भन्सारका गोदाममा थन्कियो होला । यता पठाएर कसैले नकिनेपछि गोदाममै कुहिने अवस्था छ । अरुवा मोटो चामल हुँदा पनि खासै चामल किन्न मान्छे नआउने सीमखेत गोदाममा अहिले त झनै दिनको एकदुई किलो पनि बिक्री भएको छैन', उनले भने ।

बंगलादेशी उसिना चामल खान उपयुक्त नभएको र बजारभन्दा बढी मूल्य भएको उल्लेख गर्दै प्रमुख पाण्डेले प्रश्न गरे, 'अनि कसरी बिक्री हुन्छ ?'

सबै चामल सडेर फाल्नुपर्ने अवस्था आउने उनले बताए । बझाङमा १५ सय क्विन्टल चामल सदरमुकाम सीमखेत गोदामका लागि, २४ सय २७ क्विन्टल चामल बिसौना चौर र दुई हजार क्विन्टल चामल तल्कोट डिपोका लागि आउने गरेको छ ।

'भूकम्पपीडितहरूका लागि दिने चामल गोदाममा सड्न थालेपछि यहाँ पठाएको रहेछ,' सुवेडाका राजेन्द्रप्रसाद जोशीले भने, 'भातको सिता र दाल मिसिँदैन, खाँदाखेरी पनि उपयुक्त नभएकाले बंगलादेशी चामल कोही किन्दैन ।'

बजारमा ३७/३८ रुपैयाँ प्रतिकेजीमा मोटो चामल पाइने भए पनि खाद्य संस्थानले यसको प्रतिकेजी मूल्य ३९ रुपैयाँ लगाएकाले महँगो भएर पनि उपभोक्ता यसप्रति आकर्षित छैनन् ।

विदेशीले भूकम्प प्रभावित क्षेत्रमा पीडितहरूका लागि पठाएको राहतको चामल जिल्लामा किन पठाएको रहेछ भन्नेमा डिपो प्रमुख पाण्डे पनि अनभिज्ञ छन् । खाद्य सस्थानका अञ्चल प्रमुख डिल्लीराज लम्सालले अरुवा मोटो चामल सकिएकाले बंगलादेशी चामल पठाएको बताए । उनले भने, 'चामल बिक्री गरेको रकम पनि असहाय गरिबकै लागि खर्च गरिनेछ ।'