'संक्रमितको पहिचानसहित सम्मानित जीवन'

काठमाडौं: कीर्तिपुरस्थित बेबी लाइफ होममा एचआईभी संक्रमित बालबालिकालाई आ श्रय दिइरहेका उमा गुरुङ र राजकुमार पुनले ती बालबालिकालाई संक्रमितको पहिचानसहित सम्मानपूर्ण जीवन बाँच्ने अवसर दिलाउन प्रयत्नशील रहेको बताएका छन् ।

बालअधिकार नियमअनुसार १८ वर्षभन्दा मुनिका संक्रमित बालबालिकाको पहिचान खुलाउन नमिल्ने भए पनि उनीहरूलाई समाजमा समान दर्जा र अधिकार दिन आफ्नो संस्थाले सुरुदेखि नै पहिचान नलुकाएको जानकारी उमा र राजकुमारले दिए । टेलिभिजन र पत्रपत्रिकातिर उनीहरूको वास्तविक नाम लुकाउने गरिएको उल्लेख गर्दै उमा र राजकुमारले यी बालबालिका निर्दोष रहेको र यिनीहरूको परिचय लुकाउनुपर्ने कुनै कारण नरहेको बताए ।

'उनीहरूलाई बाआमाबाट एचआईभी सरेको हो । यसमा उनीहरूको के दोष ? ' उमा र राजकुमारले भने, 'उनीहरूलाई हामीले दुरुपयोग गरेको भए पहिचान खुलाउन मिल्दैन भन्ने प्रश्न उठ्थ्यो तर हामीले उनीहरूलाई समाजमा स्थापित गराउन खोजेका छौं । कुनै नराम्रो काम गरिरहेका छैनौं ।'

अन्नपूर्ण पोस्ट्को प्रथम पृष्ठमा शनिबार 'भविष्य खोज्दैछन् संक्रमित बालबालिका' शीर्षकमा छापिएको तस्बिरप्रति इंगित गर्दै उनीहरूले भने, 'बालबालिकाको जुन भोगाइ छ त्यसको पहिचान आवश्यक छ । बरु उनीहरूलाई विद्यालयले भर्ना लिन नमान्दा, डाक्टरले उपचार गर्न नमान्दा, समाजमा घृणा र अपहेलना गर्दा हामीले आवाज उठाउनुपर्छ ।'

राम्रो कुराको पहिचान खुलाउनुपर्छ भन्ने उद्देश्य रहेको उल्लेख गर्दै उनीहरूले बेबी लाइफ होममा आ श्रय लिइरहेका बालबालिकाले टेलिभिजन र पत्रपत्रिकामा अनुहार छोपेको मन नपराएको बताए । 'उनीहरू पहिचान खोजिरहेका छन् । हामीले उनीहरूका काका, काकी, मामा, हजुरआमालगायतको अनुमति लिएका छौं ।

पहिचान नखुलाउन सिकाउनेलाई बरु समाजमा भेदभाव नगर, सचेत बनाऊ भन्न चाहन्छौं', उनीहरूले भने । आफ्नो संस्थामा आ श्रय लिइरहेका बालबालिकालाई समाजमा स्थापित गराउन पहिचानसहितको एचआईभी सफलता स्कुल सञ्चालनमा ल्याएको उल्लेख गर्दै उमा र राजकुमारले राजधानीका अन्य विद्यालयले भर्ना लिन नमानेपछि यो विद्यालय खोल्न बाध्य भएको बताए ।