मोटरसाइकलका कारण हुन्छन ४० प्रतिशत दुर्घटना

काठमाडौं: उपत्यकामा हुने सवारी दुर्घटनाको मुख्य कारक मोटरसाइकल रहेको पाइएको छ । उपत्यकामा एक वर्षभित्र भएका पाँच हजार एक सय ६६ मध्ये दुई हजार ६६ वटा दुर्घटनाको कारक मोटरसाइकल रहेको तथ्य ट्राफिक प्रहरीले एक अध्ययनले देखाएको हो ।

महानगरीय ट्राफिक प्रहरी महाशाखाले उपत्यकामा हुँदै आएको दुर्घटनामा संलग्न सवारीसाधनको प्रकारबारे अभिलेख भिडाउँदा मोटरसाइकल चालकको बढी लापरबाही भेटिएको पाइएको छ । अध्ययनअनुसार मोटरसाइकल चालकले खाली ठाउँ देख्नै नहुने, विपरीत दिशाबाट ओभरटेक गर्ने, सडकको लेन नमान्ने, जेब्राक्रसिङमा झन् बढी तीव्र गतिमा हाँक्नेजस्ता लापरबाही गर्दै आएको पाइएको छ ।

बसको कारणले १२ प्रतिशत, कारको कारणले २७ प्रतिशत, ट्यांकर र ट्रकको कारणले १२ प्रतिशत, ट्याक्टरको कारणले चार प्रतिशत, साइकल र रिक्साको कारणले पाँच प्रतिशत र टेम्पाको कारणले एक प्रतिशत दुर्घटना हुने गरेको महाशाखाले जनाएको छ ।

महाशाखाले २०७२ देखि यस वर्षको असारसम्म उपत्यकामा भएका दुर्घटना संख्यालाई आधार मानेर अध्ययन गरेको थियो ।बाग्मती अञ्चलमा झन्डै नौ लाख सवारीसाधन दर्ता छन् । यसमा सात लाख ७० हजार बढी मोटरसाइकल छन् ।

तीमध्ये अधिकांश मोटरसाइकल उपत्यकाभित्रै गुड्छन् । सहरका मुख्य चोकचोकमा बढी जामको कारक पनि मोटरसाइकल नै रहेको अध्ययनले देखाएको छ । सडकको विकल्प नहुँदा भाडाका, निजी, सानाठूला सवारीसाधन एउटै सडक लेनमा गुड्नुपर्ने बाध्यता उपत्यकामा छ । त्यसमा पनि मोटरसाइकलको संख्या अत्यधिक बढेपछि यसलाई रोक्नुपर्ने विकल्पसमेत उठेको छ ।

गत वर्ष पाँच हजार एक सय ६६ वटा दुर्घटनामा परी एक सय ६६ जनाको मृत्यु भएको छ । अधिकांश मोटरसाइकल दुर्घटनाबाटै मृत्यु भएको महाशाखाले जनाएको छ । 'सडकमा अन्य सवारीसाधनभन्दा मोटरसाइकल चालक बढी हतारमा देखियो । सानो ठाउँ पायो कि बाटो पहिल्याइहाल्ने, विपरीत दिशाबाट ओभरटेक गर्ने, जिक ज्याक चलाउने स्ता समस्या मोटरकसाइकल चालकमा छन् । दुर्घटना पनि यस्तै लापरबाहीले निम्त्याउँदै आएको हाम्रो अध्ययनले देखाएको छ', महाशाखा प्रमुख डीआईजी प्रकाश अर्यालले भने ।

जथाभाबी रोकेर यात्रु राख्ने र झार्ने समस्या माइक्रोचालकमा देखिएको अध्ययनबाट देखिएको छ । सहचालकले गुडिरहेका बेलामा पनि ढोका खोलेरै यात्रु बोलाउने र गुड्दागुड्दै यात्रु झार्दै आएका छन् । ट्याक्सी जथाभाबी पार्किङ गर्ने र यात्रु खोज्न ट्याक्सी चालकले जिकज्याक गरी हाँक्दै आएका छन् ।

महाशाखाको अध्ययनले उपत्यकामा २२ स्थान दुर्घटनाको अत्यन्तै जोखिम ठाउँ पहिल्याएको छ । कलंकी, कालीमाटी, बबरमहल, मीनभवन, एयरपोर्ट, बौद्ध, माइतीघर, सातदोबाटो, ग्वार्को, थानकोट, सीतापाइला, गोंगबु, महाराजगन्ज, सुकेधारा, चाबहिल, जाउलाखेल, सिंहदरबार, बूढानीलकण्ठ, गौशाला, सानेपा, सल्लाघारी, भक्तपुर, गठ्ठाघरलाई महाशाखाकाले 'ल्याक स्पट' का रूपमा ठम्याएको छ । यी स्थानमा बढ्दो सवारी चाप र चालकको लापरबाहीले दुर्घटना बढी हुँदै आएको पाइएको छ ।