काबुलः अफगानिस्तानको काबुलमा रहेको अमेरिकन विश्वविद्यालयमा भएको बम विस्फोटमा परी १३ जनाको मृत्यु भएको छ।
आक्रमणमा मारिनेमा सात जना विद्यार्थी रहेका छन्। विस्फोटमा परी ३५ विद्यार्थी र ९ प्रहरी घाइते भएका छन्।
घटनाको दश घन्टापछि विश्वविद्यालयमा बम विस्फोट गराउने दुईजना आक्रमणकारी सुरक्षाकर्मीको कारबाहीमा मारिएको विविसीले जनाएको छ। घटनामा तीन प्रहरी र तीनजना सुरक्षा गार्डसहित ७ जना विद्यार्थीको मृत्यु भएको काबुल प्रहरीका प्रमुख अब्दुल रहमान रहीमीले जानकारी दिएका छन्।
विश्वविद्यालयभित्रै थुनिएका विद्यार्थी र कर्मचारीलाई भने प्रहरीले उद्धार गरेको छ। आक्रमणकारीको नियन्त्रणमा रहेका ७ सय ५० भन्दा बढी विद्यार्थी र कर्मचारीको उद्धार गरिएको रहीमीले जानकारी दिए। घटनाको जिम्मेवारी भने अहिलेसम्म कुनै पनि समूहले लिएको छैन।
प्रतिक्रिया दिनुहोस !
