एजेन्सीः जब भारतमा भारु पाँच सय र हजारका नोटमा प्रतिबन्ध लग्यो तब सार्वसाधारण र व्यापारिमा हाहाकार मच्चियो ।
भारतमा भारु प्रतिबन्ध भएपछि भारु नोट प्रतिबन्धको सिकार भारतीय प्रधानमन्त्री नरेन्द्र मोदीकी ९७ बर्षीया आमा हीरावेन मोदी समेत भएकी छिन् ।
जब मोदीले अघिल्लो मंगलबारको राति भारु पाँच सय र हजारका नोटमा प्रतिबन्ध लगाए तब उनकी आमाले समेत दुःख पाएकी हुन् ।
भारतको गुजरात राज्यमा बस्दै आएकी मोदीकी आमा समेत त्यहाँको एक बैंकमा आफूले राखेका पाँच सय र हजारका नोट साट्न पुगेकी हुन् ।
मोदीकी आमाले साट्नका निम्ति ४५ सय भारु बोकेकी थिइन् । उनले ४५ सय भारु साट्नका निम्ति डेढ घण्टा लाइन लाग्नु परेको भारतीय सञ्चार माध्यमले जनाएका छन् । वृद्ध शरीर दुःखका साथ नोट साटेको प्रतिक्रिया उनले भारतीय सञ्चार माध्यममा दिएकी छिन् ।
नोट साट्न मोदीकी आमा पुगेपछि बैंकका कर्मचारीले साहारा दिएर उनलाई सहयोग गरेका थिए । बैंकका कर्मचारीकै मद्दतमा नोट साटेर मोदीकी आमाले ल्याप्चे लगाएकी थिइन् ।
पूरै भारतमा नोट साट्नेको भिड लागेकै समयमा मोदीकी आमा नोट साट्न गुजारातको गान्धिनगरस्थित ओरियन्टल बैंक अफ कमर्समा पैसा साट्न पुगेकी हुन् । पैसा साट्न बैंकमा पुग्नु पर्दा कष्ट भएको उनले बताएकी छिन् ।
मोदीले पाँच सय र हजारका भारतीय नोटमा प्रतिबन्ध लगाएर मोदीकी आमालाई जस्तै सम्पूर्ण भारतीय नागरिकलाई दुःख दिएको भन्दै चौतर्फी आलोचना भइराखेको छ ।
भारतको राजधानी नयाँदिल्लीका मुख्य मन्त्री अरबिन्द केजरिवालले समेत मोदीले नोटमाथि प्रतिबन्ध लगाएर भारतीय नागरिकलाई मात्र नभएर आफ्नी आमालाई समेत दुःख दिएको भन्दै आलोचना गरेका छन् ।
मोदीले भारु पाँच सय र हजारमा प्रतिबन्ध लगाएपछि सबै भारतीय सर्वसाधारणदेखि व्यापारीसम्मको काम भारु साट्ने भएको छ ।
भारतीय पाँच सय र हजार नोटमा लागेको प्रतिबन्धले नेपालका सर्वसाधारण र व्यापारी समेत आफ्नो पैसा कागजमा परिणत हुने हो कि भन्ने त्रासमा छन् ।
प्रधानमन्त्री पुष्पकमल दाहाल ‘प्रचण्ड’ले नेपालमा रहेका भारु नोट साट्ने उचित व्यवस्था गर्न भारतीय समकक्षी मोदीलाई आग्रह गरे पनि भारतले नेपालमा रहेका भारु रुपैयाँबारे ठोस प्रस्ताव अझैसम्म अघि सारेको छैन् ।
प्रतिक्रिया दिनुहोस !
