‘भारतको अनावश्यक हस्तक्षेप किन ?'
नयाँदिल्लीः नेपाल र भारतबीचको सम्बन्ध सुधारका लागि युवा पुस्ताको भूमिकाबारे दुवै देशका विधार्थी नेताले छलफल गरेका छन् । नयाँदिल्लीस्थित दूतावासमा आयोजित एक कार्यक्रममा दुवै मुलुकका विभिन्न दलका विद्यार्थी नेताबीच छलफल भएको थियो ।
कार्यक्रममा एमालेनिकट अखिल नेपाल स्वतन्त्र विद्यार्थी युनियनकी अध्यक्ष नवीना लामाले नेपालको आन्तरिक राजनीतिमा हस्तक्षेप गर्ने भारतको रबैयाप्रति युवा पुस्ताले चासो राखेको बताइन् ।
संविधान निर्माण र संशोधन नेपालको आन्तरिक विषय भएकाले त्यसमा भारतको चासोलाई युवा पुस्ताले हस्तक्षेपका रूपमा बुझेको उनले प्रस्ट पारिन् । भारतको ठूल्दाइ प्रवृत्तिप्रति युवालाई नपच्ने भन्दै उनले नेपाललाई हेर्ने भारतको दृष्टिकोणमा परिवर्तनको खाँचो औंल्याइन् ।
नेपाल विद्यार्थी संघका अध्यक्ष नैनसिंह महरले नेपाल र भारतबीचको सम्बन्धमा दिगोपन आउन नसकेको उल्लेख गर्र्दै अबका दिनमा युवा नेतृत्वले भूमिका खेल्नुपर्ने बताए । नेपालको राजनीतिक स्थिरता र आर्थिक विकास नहुँदा त्यसको प्रतिकूल असर भारत र चीन दुवैलाई पर्ने भएकाले त्यसतर्फ सहभागी नेताहरूको ध्यानाकर्षण गराएका थिए ।
कार्यक्रममा नयाँ शक्ति पार्टीकी युवा नेत्री मानुषी भट्टराईले नेपाल भारतबीचको सम्बन्ध विस्तारमा इकोनोमिक डिप्लोमेसीको खाँचो औंल्याइन् । उदीयमान शक्ति तथा दक्षिण एसियाको नेतृत्वदायी भूमिकामा रहेको भारतले नेपालसँगको दीर्घकालीन सम्बन्धका लागि शैक्षिक, सांस्कृतिक विषयतर्फ केन्द्रित हुनुपर्ने उनको भनाइ थियो ।
भारतीय विपक्षी दल कांग्रेस आईका युवा नेता नदिम जावेदले नेपाललाई सहयोग गर्नेमा सबैभन्दा अगाडि भारत नै सर्ने गरेको बताउँदै भारतका शैक्षिक संस्थामा नेपाली विद्यार्थीको भर्ना बढाउनुपर्नेमा जोड दिए ।
कांग्रेसनिकट भारतीय राष्ट्रिय विद्यार्थी युनियनकी अध्यक्ष अमृता धवनले भारत र नेपालको सम्बन्धबारे नेतृत्वले आत्मसमीक्षा गरेर अगाडि बढ्नुपर्ने बताइन् । भारतीय जनता पार्टीनिकट युवा नेता रोहित चाहालले नेपाल-भारत सम्बन्धमा ‘ग्याप' आएको स्वीकार्दै त्यसलाई कम गर्न युवा नेताले महत्वपूर्ण भूमिका खेल्नसक्ने बताए ।
अखिल भारतीय विद्यार्थी परिषद्को राष्ट्रिय अधिवेशनमा भाग लिन नेपालबाट आमन्त्रित युवा-विद्यार्थी तथा भारतीय विद्यार्थी नेताबीचको छलफलमा अनेरास्ववियु क्रान्तिकारीका अनिल शर्मा, राप्रपा विद्यार्थी संघका श्याम यादव, तमलोपा विद्यार्थी मञ्चका मनीष मिश्रलगायत सहभागी थिए ।
प्रतिक्रिया दिनुहोस !
