कोरियाले रोक्यो सीबीटी परीक्षा

सोल: सीबीटी पास गरी फर्कने युवाको संख्या बढेपछि दक्षिणकोरियाले २०१७ का लागि सीबीटी परीक्षा स्थगित गर्ने भएको छ । पुनः प्रवेशका लागि सीबीटी पास गरी प्रतीक्षा सूचीमा धेरै कामदार रहेकाले यस वर्षका लागि सीबीटी रोक्ने निर्णय गरिएको हो ।

सीबीटी पास गरी लामो समय रोस्टरमा रहेका युवा कोरिया प्रवेश गर्न असमर्थ रहेकाले श्रम मन्त्रालयले ईपीएस लागू गरेको १६ देशमा सीबीटी परीक्षा रोक्ने निर्णय गरेको हो । सीबीटी पास गरेको दुई वर्षभित्र कम्पनीबाट माग नभएको अवस्थामा रोस्टरबाट स्वतः नाम हटाउने गरिएको छ । दुईपटक स्वास्थ्य परीक्षण गरी कामदारहरू प्रतीक्षारत छन् ।

तीन वर्ष कोरिया बसेर फर्कनेका लागि २०१३ देखि सीबीटी परीक्षा प्रणाली सुरु गरिएको थियो । हालसम्म १५ चरणमा सीबीटी परीक्षा भएको छ । ईपीएस कार्यालयले दिएको जानकारीअनुसार एक हजार दुई सयभन्दा बढी कामदार प्रतीक्षासूचीमा छन् ।

१६ देशमा सञ्चालित सीबीटी परीक्षाबाट पास भएर प्रतीक्षा सूचीमा रहेकालाई २०१७ मा कोरिया फर्कन अवसर दिने मन्त्रालयको तयारी छ ।

सीबीटी परीक्षा २०१७ का लागि स्थगित गर्ने निर्णयमा मन्त्रालय पुगे पनि मातहतका विभाग तथा विदेशस्थित ईपीएस कार्यालयलाई जानकारी केही दिनपछि गराउने जनाइएको छ ।

प्रवासी मजदुर युनियनका अध्यक्ष उदय राईले मन्त्रालय तहमा निर्णय भई परिपत्रको प्रक्रियामा रहेको जानकारी प्राप्त भएको बताए । उनका अनुसार औपचारिक जानकारी एचआरडी कार्यालयलाई पनि पठाइएको छैन ।

ईपीएस कार्यालयले सीबीटी रोकिएको आधिकारिक पत्र प्राप्त नभएको जानकारी गराएको छ । ईपीएस कार्यालय निर्देशक बाबुराम खतिवडाले सीबीटी परीक्षा २०१७ का लागि स्थगितबारे औपचारिक तथा अनौपचारिक जानकारी नआएको बताए ।

उनले भने १५ औं चरणको सीबीटी परीक्षापछि १६ औ चरणको परीक्षा सञ्चालन गर्नेनगर्ने विषयमा जानकारी दिइएको छैन ।

सीबीटी स्थगित भएको कारणले अवैधानिक नेपाली बढ्नसक्ने प्रति खतिवडाले चिन्ता व्यक्त गरे । अघिल्लो महिना वैदेशिक कामदार नीति निर्धारण समितिले नेपाली सबैभन्दा कम गैरकानुनी रूपमा बसेको तथ्यांक निकालेको थियो । अवैधानिक नेपाली कामदार सात सय ७३ जना रहेको उल्लेख छ ।