दमौली : तनहुँको शुक्लागण्डकी नगरपालिकाले कर तिर्न नगरपालिका कार्यालय आउन नपर्ने व्यवस्था मिलाएको छ । सूचना र प्रविधिको उपयोग भएपनि स्थानीय तहले एकीकृत सम्पत्ति कर भने मुख्य कार्यालयमै तिर्नुपर्ने व्यवस्था गरेका छन् । तर सूचना प्रविधिको विकासमा निकै अगाडि बढेको नगरपालिकाले नगरलाई बुझाउनुपर्ने सबै करसमेत वडाबाटै लिन मिल्ने व्यवस्था मिलाएको छ । नगरपालिकाले सबै वडा कार्यालयमा इन्टरनेटको पहुँच विस्तार गरेर कर तिर्नकै लागि कार्यालय नआइ जुनसुकै वडा कार्यालयबाट तिर्न सकिने व्यवस्था गरेको नगरपालिकाका सूचना तथा प्रविधि शाखा प्रमुख त्रिलोचन लम्सालले बताए ।
नगरपालिका भएपनि ठूलो भूगोलका कारण कर बुझाउनकै लागि कार्यालय जानुपर्दा सास्ती भोगेको गुनासो गर्ने वडा नम्बर ७ का खड्गसिं थापा अहिले वडाबाटै तिर्न पाउँदा सजिलो भएको बताउँछन् । ‘यत्तिले गर्दा पनि धेरैलाई सजिलो भएको छ’, उनले भने । यसअघि धेरै नगरवासीको गुनासो वडामै सबै कर बुझाउन पाउनुपर्ने थियो । सिफारिसका लागि शुल्क वडामै बुझाए पनि एकीकृत सम्पत्ति करका लागि भने नगरपालिकामा मात्र लिने व्यवस्था थियो । ‘सूचना प्रविधि भएपछि वडाबाटै लिएपनि सिधै नगरपालिकामा जानकारी आउने भएको छ’, सूचना प्रविधि शाखा प्रमुख लम्सालले भने,‘यसले वडावासीलाई पनि सहज भएको छ ।’ नगरपालिकामा हुने अनावश्यक भिडभाडसमेत नियन्त्रण भएको अनुभव नगरपालिकाको छ ।
अनलाइनबाटै घटना दर्ता
अहिले नगरपालिकाले सूचना प्रविधिकै प्रयोग गरेर व्यक्तिगत घटना दर्ता अनलाइनबाटै गर्न सकिने व्यवस्था गरेको छ । ‘घरमा इन्टरनेट नहुनेका लागि समेत वडाबाटै अनलाइनमा दर्ता गर्ने व्यवस्था गरिएको छ,’ लम्सालले भने । यसले गर्दा व्यक्तिगत घटनाका तथ्यांक एकै ठाउँमा राख्न र समयअनुसार अद्यावधिक गर्न सहजता आएको उनको जिकिर छ । अब नगरपालिकाले पुराना कागजमा रहेका घटनाका दर्तालाई समेत डिजिटलाइज्ड गरेर सर्भरमा राख्ने तयारी गरेको छ । यसले गर्दा तथ्यांक भण्डारण र सुरक्षामा सजिलो हुने तर्क नगरपालिकाको छ ।
नगरपालिका क्षेत्रका सबै माध्यमिक विद्यालयमा शिक्षकको डिजिटल हाजिरी थालेको छ । ‘कुनै विद्यालयमा शिक्षक पुगे नपुगेको सर्भरबाट जनप्रतिनिधिले सिधै हेर्न सक्ने व्यवस्था गरिएको छ’, उनले भने । यसले गर्दा नगरपालिकाको कार्यालयबाटै विद्यालयको हाजिरी अवस्था थाहा पाउन सकिने दाबी नगरपालिकाको छ ।
मोबाइल एप्लिकेसनमा सबै सूचना
नगरपालिकाले आफूले प्रदान गर्ने सेवाबारेको जानकारी मोबाइल एपमा दिन थालेको छ । बोर्डका निर्णयहरु तथा आवश्यक जानकारीहरु मोबाइल एप दिन थालेको र एपको प्रचार गरिएको शाखा प्रमुख लम्सालले बताए । एप प्रयोग नगर्नेका लागि नगरपालिकामा डिजिटल वडापत्र राखेर जानकारी दिने गरिएको छ ।
‘प्रविधि जान्ने र नजान्नेका लागि समेत आवश्यक जानकारीको पहुँच प्रविधिकै माध्यमबाट सहज बनाइएको छ’, उनले भने । नगरपालिकाका जनप्रतिनिधिलाई समेत सूचना प्रविधिका बारेमा जानकार गराउँदै प्रयोगमा बढावा दिन थालिएको नगरपालिकाका प्रमुख किसान गुरुङले बताए । नगरपालिकाले सूचना प्रविधिको अधिकतम प्रयोग गर्दै नागरिकलाई सहज सेवा दिन थालेको उनले बताए । नगरपालिकाले सामाजिक सुरक्षा भत्ताको तथ्यांकसमेत अनलाइनबाटै लिने व्यवस्था गरेको छ । सेवाग्राहीले सिधै बैंकमा गएर लिने भत्ताको तथ्यांक अनलाइनबाटै राख्ने गरिएकाले झन्झट हटेको दाबी नगरपालिकाको छ । नगरपालिकाका प्रमुख प्रसासकीय अधिकृत काशीराम गैह«े सूचना प्रविधिबाट सहज सेवाका हिसाबले नगरपालिका यस क्षेत्रमै नमूना बन्ने प्रयासमा रहेको बताए ।
प्रतिक्रिया दिनुहोस !
