पोखराः चालु नगर सभामा पोखरा लेखनाथ महानगरपालिकाको नाम फेर्ने प्रस्ताव पेस भएको छ । वडा नम्बर १९ का अध्यक्ष तथा नेपाल कम्युनिस्ट पार्टीका सचेतक शोभामोहन पौडेलले सोमबार पेस गरेको प्रस्तावलाई वडा नम्बर ९ का अधयक्ष तथा नेपाली कांग्रेसका नेता रामराज लामिछानेले समर्थन गरेका छन् ।
उक्त प्रस्तावमाथि नगर सभामा मंगलबार छलफल हुने भएको छ । १६७ सदस्यीय महानगर कार्यपालिकामा नेकपा र कांग्रेसबाहेक अरु कुनै पनि पार्टीका सदस्य छैनन् ।
दुवै दल उक्त प्रस्तावको पक्षमा देखिएको हुँदा महानगरको नामबाट लेखनाथ शब्द हट्ने पक्कापक्की जस्तै देखिएको छ । ३३ वडामध्ये २२ मा साविक एमाले र ११ मा कांग्रेस वडाध्यक्ष छन् । मेयर उपमेयरसमेत साविक एमालेबाट निर्वाचित हुन् । कार्यपालिकामा पछि मनोनित ८ जना पनि सोही पार्टीका समर्थक थिए ।
स्थानीय तहको नाम हेरफेर गर्न कार्यपालिकाको २÷३ मतले पारित गर्नुपर्ने संवैधानिक व्यवस्था छ । कार्यपालिकाले पारित गरेको प्रस्ताव प्रदेश सरकारलाई पठाएपछि उसको सिफारिसमा संघीय सरकारले सदर गरेपछिमात्रै नाम हेरफेर हुन्छ ।
२०७३ साल फागुनमा पोखरा उपहानगर पालिका र लेखनाथ नगरपालिकालाई मिलाएर राज्य पुनःसंरचना आयोगले पोखरा लेखनाथ महानगरपालिका बनाएको थियो । पोखरा अन्तर्राष्ट्रिय ख्यातिप्राप्त नाम हुँदा हुँदै लेखनाथको फुर्काे जोडेर अनावश्यक रुपमा लामो र झन्झटिलो नाम राखिएको भन्दै सुरुदेखि नै विरोध हुँदै आएको थियो ।
नाम फेर्ने प्रस्ताव हिउँदे अधिवेशनमै पेस भए पनि मेयर मानबहादुर जिसीले सबै सरोकारावालाहरुको समेत सुझाव लिएर निर्णय गर्ने गरी प्रस्ताव अगाडि लैजान रोकेका थिए । नगरपालिकामा पर्ने २६ देखि ३३ वडा सम्मका वडाध्यक्ष पनि पोखरा महानगरपालिका मात्रै राख्न सहमत भएपछि यसपालिको नगर सभामा प्रस्ताव फेरि पेस भएको हो ।
यसबीचमा थुप्रै गुनासा र सुझाव पनि आएको वडाध्यक्ष पौडेलले सुनाए । पोखरा आफैंमा अन्तर्राष्ट्रिय ख्यातिप्राप्त नाम भएकाले लेखनाथ हटाउन प्रस्ताव पेस गरेको वडाध्यक्ष पौडेलले जानकारी दिए । ‘जनजनमा भिजेको नाम पोखरा नै हो, लेखनाथ पनि राख्दा महानगरभित्र दुई भूगोल छन् भन्ने भावना रहने भयो’, उनले भने, ‘लेखनाथका नाममा अरु नामहरु राख्न सकिन्छ ।’
प्रतिक्रिया दिनुहोस !
