बलात्कारपछि बालिका हत्या प्रकरणः सीआईबीको टोली कञ्चनपुरमा
साउन १३, २०७५ आइतबार १८:४५:०
महेन्द्रनगर : बलात्कारपछि हत्या गरिएकी कञ्चनपुरको उल्टाखामकी १३ वर्षिया बालिका निर्मला पन्तको हत्याका सम्बन्धमा अनुसन्धान गर्न प्रहरीको केन्द्रीय अनुसन्धान ब्यूरो (सीआईबी)को टोली महेन्द्रनगर पुगेको छ ।
हत्याबारे भइरहेको अनुसन्धानमा सहयोग पुर्याउन सीआईबीको टोली महेन्द्रनगर पुगेको एसपी दिल्लीराज विष्टले जानकारी दिए । प्रहरी नायव उपरीक्षक अगुंर जीसीको नेतृत्वमा तीन जनाको टोली महेन्द्रनगर आएको हो । टोलीमा एकजना प्रहरी निरीक्षक र एकजना प्रहरी नायव निरीक्षक रहेका छन् । टोलीले कञ्चनपुर प्रहरीसँग समन्वय गरेर घट्नाको अनुसन्धान गर्नेछ ।
‘सीआईबीले आवश्यक टेक्निकल सहयोग र घट्नाको अनुसन्धानमा समेत सहयोग गर्नेछ’ उनले भने । ‘घट्नाको सत्यतथ्य छिट्टै बाहिर ल्याउने हिसाबले हामीले अनुसन्धान अघि बढाएका छौं ।’ हत्या भएको चारदिन बितिसक्दा समेत अहिलेसम्म अपराधि पहिचान हुन नसक्दा महेन्द्रनगर तनावग्रूत बनेको छ । घटनामा प्रहरीले सक्रियता नदेखाएको भन्दै चौतर्फि विरोध भएपछि प्रहरीले सीआईबीको टोली महेन्द्रनगर पठाएको हो ।
आइतबारको संघीय संसद र प्रदेश सभा बैठकमा बोल्दै यस क्षेत्रका सांसदहरुले घट्नाको तत्काल सत्यतथ्य बाहिर ल्याउन र दोषिलाई कानुनी कठघरामा उभ्याउन माग गरेका थिए ।
प्रहरीका अनुसार अहिलेसम्म घटनाको अनुसन्धान गर्न केहीलाई नियन्त्रणमा लिएर सोधपुछ भइरहेको छ । ‘हामीले शंकास्पद मानिसलाई नियन्त्रणमा लिएर सोधपुक्ष गरिरहेका छौं’ एसपी विष्टले भने, ‘छिट्टै अपराधी पत्ता लाग्ने छ ।’
बालिकाको शव भेटिएको दिनदेखि आन्दोलन शुरु भएकाले अनुसन्धानमा केही असहज भएको प्रहरीको भनाई छ । आइतबार पनि दिनभर अस्पताल परिसर तनावग्रस्त रह्यो । पीडित परिवारले शव उठाएर दाहसंस्कार गर्ने तयारी गरेपनि दिनभर स्थानीय र अन्य आन्दोलनकारीले शव उठाउन नदिएपछि अस्पताल परिषद दिनभरी तनावग्रस्त भएको हो ।
बालिकाकी आमा दुर्गादेवी पन्तले छोरीको दाहसंस्कार गर्न दिन भनिरहे पनि स्थानीयको दवावले दिनभर दाहसंस्कार हुन सकेन । ‘मेरो छोरीको निर्ममरुपले हत्या गर्ने दोषीलाई छोडनुहन्न’ उनले भनिन्, ‘मेरो छोरीको आत्माले न्याय पाउनुपर्छ ।’ बालिकाका बुवा भने राज्यपक्षले लिखित सहमति नगरेसम्म दाहसंस्कार नगर्ने अडानमा थिए ।
पीडित परिवारले घट्नाको सत्यतथ्य सार्वजनिक हुुनुपर्ने, घट्ना भएको क्षेत्र सुरक्षाका कारणले समेत संवदेनशिल रहेको भन्दै प्रहरी बिट स्थापना हुनुपर्ने र राहत तथा क्षतिपूर्ति दिइनुपर्ने माग गरेका थिए । हत्या भएको चारदिन बितिसक्दा पनि घट्नामा संलग्नहरुको पहिचान हुन सकेको छैन ।
प्रतिक्रिया दिनुहोस !
