काठमाडौं : भूमिगत विद्युत् प्रसारण लाइन निर्माणमा ऊर्जा मन्त्रालयले तदारुकता देखाएको छ । निर्माणका क्रममा देखिएका अवरोध स्थलगत अनुगमन गरी त्यहींबाट समाधानको उपाय खोज्न ऊर्जा मन्त्री, सचिव र विद्युत् प्राधिकरणका कार्यकारी निर्देशक फिल्डमा उत्रेका छन् ।
त्रिशूली-काठमाडौं २२० केभी डबल सर्किट प्रसारण लाइनको मातातीर्थमा १ हजार ३ सय ९ मिटर भूमिगत लाइन बनाउनु पर्छ । त्यसमध्ये हालसम्म ६ सय ३० मिटरको काम सकिएको हो ।
४८ प्रतिशत काम सकियो
भूमिगतरुपमा २४ वटा तार राख्न मिल्ने गरी संरचना बनिरहेको छ । यो भूमिगत विद्युत प्रसारण संरचना निर्माण ४८ प्रतिशत सकिएको प्राधिकरणले जनाएको छ ।
ऊर्जा, जलस्रोत तथा सिंचाइ मन्त्री वर्षमान पुन, सचिव अनुपकुमार उपाध्याय र विद्युत प्राधिकरणका कार्यकार्य निर्देशक कुलमान घिसिङले आइतबार आयोजनाको स्थलगत निरीक्षण गरी भूमिगत लाइनको सिभिल संरचना निर्माणको बाँकी काम दुई महिनाभित्र सक्न आयोजना र ठेकेदार कम्पनीलाई निर्देशन दिएका छन् ।
दुर्इ महिनामा निर्माण सकिँदै
ठेकेदार कम्पनीले निर्माणमा भइरहेको स्थानीय अवरोध हटाई सुरक्षाको प्रत्याभूति दिइएमा र वन क्षेत्रको समस्या तत्काल समाधान भएमा दुई महिनाभित्र काम सक्ने प्रतिबद्धता जनाएको छ । निर्माणका लागि अहिले २ सय ७० श्रमिक परिचालित छन् ।
रुख कटानमा समस्या रहेको जानकारी भएपछि मन्त्री पुनले आयोजनास्थलबाटै वन तथा वातावरण मन्त्री शक्तिबहादुर बस्नेतलाई फोन गरी गाँठो फुकाइदिन आग्रह गरेका थिए ।
‘स्थानीयलाई मिलाउँछौं, गृह मन्त्रीसँग कुरा भइसकेकाले कार्यस्थलमा सुरक्षा दिन्छौँ, रुख कटानमा रहेको समस्या समाधान गछौं’,मन्त्री पुनले भने,‘सिभिल संरचना निर्माणको काम तोकिएको मापदण्ड र गुणस्तरमा दुई महिनाभित्रमा जसरी पनि सक्नु पर्छ ।’
काटिँदै ३३६ रूख
मन्त्रिपरिषद्ले महालक्ष्मी मातातीर्थ सामुदायिक वन उपभोक्ता समिति अन्तर्गत पर्ने ६ सय ८२ वटा रुख काट्न स्वीकृति दिएको थियो । तर, अहिले प्रसारण लाइनको रुट केही परिर्तन हुँदा काट्नुपर्ने रुखको संख्या ३ सय ३६ मा झरेको छ ।
रुख कटानको स्वीकृतिका लागि फाइल वन विभागका पुगेको छ । रुखको संख्या घटेकाले स्वीकृतिका लागि पुन पेश गर्नु परेको आयोजनाले जनाएको छ । काट्नु पर्ने रुखमा टाँचा पनि लगाइसकिएको छ ।
भूमिगत लाइनका लागि सडक खनिएकाले वर्खाकोबेला हिलो भएकाले स्थानीयले काममा अवरोध गर्दै आएका छन् । मन्त्री पुनले हिलो बाटोमा ढुंटागिट्टी हाल्दा समस्या समाधान हुने देखिएकाले सोही अनुसार गर्न निर्देशन दिएका छन् ।
त्रिशूली 'ए' को बिजुलीलार्इ भूमिगत लाइन
प्रसारण लाइन तत्कालका लागि ६० मेगावाटको माथिल्लो त्रिशूली 'ए' को विद्युत काठमाडौं ल्याउन निर्माण गरिएको हो । माथिल्लो त्रिशूली 'ए' को निर्माण आगामी पुसमा सक्ने लक्ष्य राखिएको छ ।
प्रसारण लाइन पनि त्यही अवधिभित्र बनासक्नु पर्ने दबाब छ । ४५ किलोमिटर प्रसारण लाइनको एक सय ४० टावरमध्ये एक सय २७ वटाको जग हालिसकिएको आयोजना प्रमुख फडिन्द्रराज जोशीले जानकारी दिए ।
यो प्रसारण लाइन आगामी दिनमा त्रिशूली कोरिडोरमा निर्माण भइरहेका जलविद्युत आयोजनाको विद्युत काठमाडौँ ल्याउनसमेत प्रयोग गरिने प्राधिकरणले जनाएको छ । प्रसारण लाइन नेपाल सरकार र प्राधिकरणको लगानी तथा चिनियाँ एक्जिम बैकको सहुलियतपूर्ण ऋणमा बनिरहेको छ ।
प्रतिक्रिया दिनुहोस !
