स्याङ्जा : सरकार भूकम्पपीडितका अब बन्ने घर सुरक्षित बनोस् भनिरहेको छ । तर, केही भूकम्प प्रभावितले भने राज्यको आँखा छल्ने काम गरेका छन् ।
फेदीखोला गाउँपालिकामा खटिएका इन्जिनियर रामचन्द्र गौतमले फेदीखोलामा बनिरहेका ६० प्रतिशत घर भूकम्पप्रतिरोधी नभएको बताए । फेदीखोला–४ का एक भूकम्पपीडिले कम रड प्रयोग गरी घर बनाइरहेको भेटिएपछि सो रहस्य खुलेको हो । साथै प्राविधिक टोलीले उक्त भूकम्पपीडितलाई घरमा रड थप्न लगाएको थियो ।
‘गाउँपालिकामा बनेका एक सय ५ घरमध्ये ४२ वटा मात्र भूकम्पप्रतिरोधी बने, अरूले फेरि सुधार गर्नुपर्ने देखिएको छ’, उनले भने, ‘केहीले रड कम हालेका छन्, कसैको सिमेन्टको मात्रा मिलेको छैन ।’
फेदीखोला गाउँपालिकाभित्र १ सय ४६ वटा घर बन्नुपर्नेमा अहिलेसम्म दोस्रो किस्ता लिनेको संख्या पनि न्यून देखिएको छ । तेस्रो किस्ताको मागै भएको छैन । राज्यले फेदीखोला गाउँपालिकामा प्राविधिक खटाउन ढिला गरेको र भूकम्पपीडितले आफूखुसी घर बनाउँदा समस्या भएको इन्जिनियर गौतम बताउँछन् । फेदीखोलामा अरू नगर वा गाउँपालिकामा भन्दा पछि प्राविधिक पुगेका थिए ।
२०७२ को भूकम्पका कारण स्याङ्जामा ९ हजार ९२ घर प्रभावित भएका थिए । प्रभावितमध्ये ८ हजार ७ सय ६६ घरधनीले सरकारी अनुदान लिने सम्झौता गरेका थिए । तीमध्ये ८ हजार ४ सय ८५ घरले पहिलो किस्ता लिएका छन् । पहिलो किस्ता लिएकामध्ये अहिले १ हजार एक सय ५१ ले मात्र दोस्रो किस्ता लिएका हुन् ।
स्याङ्जामा ५ सय ६७ घर आंशिक क्षति भएर प्रवलीकरण गर्नुपर्ने सूचीमा छन् भने २ सय ८३ ले मात्र पहिलो किस्ता लिएको राष्ट्रिय पुनर्निर्माण प्राधिकरण जिल्ला आयोजना कार्यान्वयन इकाइ स्याङ्जाका प्रमुख प्रवीण ढकालले जानकारी दिए ।
केही लाभग्राहीले पहिलो किस्ताबापत ५० हजार रुपैयाँ लिएर भत्काउन नमानेको बताउँदै यस्ता लाभग्राहीलाई प्रवलीकरणमा आउन प्रमुख ढकालको आग्रह छ । असार मसान्तसम्म स्याङ्जाका भूकम्प प्रभावितमध्ये १३.५६ प्रतिशतले मात्र दोस्रो किस्ताको रकम लिएका छन् । भूकम्प प्रभावित घरमूलीले भूकम्पप्रतिरोधी घर निर्माण गरेबापत ३ पटकमा ३ लाख रुपैयाँ पाउँछन् । पहिलो किस्तामा ५० हजार, दोस्रोमा एक लाख ५० हजार र तेस्रो किस्तामा १ लाख रुपैयाँ पाउने व्यवस्था छ ।
प्रतिक्रिया दिनुहोस !
