सिमरा : नेपाली फुटबलको विकासका लागि अखिल नेपाल फुटबल संघ (एन्फा) ले सुरु गरेको ‘ग्रासरुट’ फुटबलमा बालबालिकाको रुची बढ्न थालेको छ ।
जिल्ला फुटवल संघ बाराले सिमरामा सञ्चालन गरिरहेको अभ्यास चरणको दोस्रो हप्तामै विद्यालयका बालबालिकाले उत्साहजनक सहभागिता देखाएका छन् ।
सिमरा रंगशालामा शनिवार बिहान झण्डै दुई सय बालबालिका उपस्थित हुँदा जिल्ला फुटबल संघका पदाधिकारी समेत उत्साहित देखिन्थे । रंगशालामा बालिबालिका मात्र नभई उनका अभिभावक समेत उपस्थित भए ।
आफ्ना सन्तानलाई लिएर रंगशाला पुगेका अभिभावकलले फुटबल अभ्यासमा बालबालिकाको हौसला बढाएको दृश्य हेर्न लायक थियो । सिमराका वीरेन्द्र वाईबाले एन्फाको यो कार्यक्रमले फुटबलको विकाससँगै साना बालबालिकालाई स्वस्थ र कुलतमुक्त राख्न महत्वपूर्ण भूमिका खेल्ने बताए ।
‘यो कार्यक्रमले भविष्यमा राम्रा खेलाडी उत्पादन हुने र नेपाली फुटबलको विकासमा सहयोग पुग्नेछपुग्नेछ’ वाईबाले भने, ‘अहिलेको अवस्थामा बालबालिकालाई पढाईसँगै खेलकुदमा ब्यस्त गराउनेछ । जसले उनीहरुलाई स्वस्थ राख्नुका साथै कुलतबाट टाढा राख्नेछ ।’
स्कुले बालबालिकालाई फुटबलमा सहभागी गराउने र दक्ष खेलाडी उत्पादन गर्ने एन्फाको चार वर्षे यो कार्यक्रममा बाराका १६ विद्यालयका झण्डै दुई सय बालबालिका सहभागी छन् । ग्रास रुट फुटबल कार्यक्रमका संयोजक एवं जिल्ला फुटबल संघका बरिष्ठ उपाध्यक्ष रामचन्द्र लामाले सोचेभन्दा बढी बालबालिकाको सहभागिताले आफूहरु समेत उत्साही भएको बताए ।
उनले भने, ‘सुरुवाती दिनमा यो कार्यक्रमको उदेश्य बुझाउन हामीलाई केही समय लाग्यो । विद्यालय र अभिभावकलाई भेटेर कार्यक्रमका बारेमा बुझायौँ तर अहिले राम्रो सहभागिता छ । यसले हामीलाई उत्साही बनाएको छ ।’
ग्रासरुट फुटबलको अभ्यासमा अहिले ८ वर्षदेखी १३ वर्षसम्मका बालबालिकालाई सहभागी गराइएको लामाले बताए । चार वर्षसम्म सञ्चालन हुने कार्यक्रमको अहिले अभ्यास भइरहेको र औपचारिक रुपमा उद्घाटन गर्न बाँकी रहेको लामाको भनाइ छ । लामाले ग्रासरुट फुटबलको औपचारिक उद्घाटनका लागि सहभागी बालबालिकालाई विशेष अभ्यास गराइरहेको जानकारी दिए ।
ग्रासरुट फुटबलको प्रशिक्षणका लागि जिल्ला फुटवल संघले कृष्णमणी चौधरीलाई प्रशिक्षक तोकेको छ । चौधरीसहित जिल्ला फुटबल संघका १० जना भन्दा बढी प्रतिनिधिले अहिले अभ्यास गराइरहेका छन् । कार्यक्रमको औपचारिक सुरुवातपछि प्रत्येक विद्यालयमा ६ दिनसम्म प्रशिक्षक पुगेर प्रशिक्षण गराउने र सातौँ दिन सिमरा रंगशालामा लिग सञ्चालन गर्ने योजना रहेको प्रशिक्षक चौधरीले बताए ।
एन्फाले यो कार्यक्रम सञ्चालन गर्नका लागि यस वर्ष ५ लाख बजेट उपलब्ध गराएको छ । एन्फाले पठाएको बजेटबाट सिमरा रंगशालामा दुई वटा चेन्जिङ रुम बनाएको लामाले बताए । चार बर्षे कार्यक्रम अघि बढाउन पूर्वाधार अति आवश्यक रहेको त्यसका लागि चेन्जिङ रुम बनाइएको लामाको भनाइ छ।
प्रतिक्रिया दिनुहोस !
