गुलरिया : बर्दियामा भारोत्तोलन (वेटलिफ्टिङ्ग) खेलका लागि खेल्ने स्थान र खेल सामाग्री नभएको प्रति खेलाडीले दुःख प्रकट गरेका छन् । सरकारले भारोत्तोलन खेलप्रति उदासिनता देखाएको भन्दै उनीहरु निरास बनेका हुन् ।
केही दिनअघि काठमांडौंमा सम्पन्न सेकेण्ड नेपाल स्ट्रोङ्गगेष्ट भारोत्तोलन प्रतिस्पर्धामा प्रथम भएका बर्दिया बारबर्दिया नगरपालिका ६ धामपुर निवासी रोशन बुढाक्षेत्रीले भारोत्तोलन खेलका लागि जिल्लामा कुनै पनि सुविधा नभएको गुनासो गरे । उनले भने, ‘खेल खेल्नका लागि बर्दियामा समस्यै समस्या छ ।’
बर्दियामा भारोत्तोलन खेलको लागि पूर्वाधार नहुँदा खेलाडीले बाँके जिल्ला पुगेर अभ्यास गर्ने गरेका छन् । उनले थपे, ‘भारोत्तोलन खेल सामाग्री लगायत प्रशिक्षक नहुँदा बाँके जिल्लामा गएर प्रशिक्षण लिनुपर्ने बाध्यता छ ।’ खेलकुद विकास समितिले पनि भारोत्तोलन खेलका लागि कुनै चाँसो दिएको छैन।
प्रतिस्पर्धामा एक सय ५ किलोग्राम तौल समूहका बुढाक्षेत्रीले स्न्याच र क्लिन एण्ड जर्क गरी १ सय ५० केजी तौल उठाएका थिए । २० वर्षीय बुढाक्षेत्रीले स्न्याचमा ६५ किलोग्राम तथा क्लिन एण्ड जर्कमा ८५ केजी तौल उठाउन सफल भएका हुन् । खेलको लागि जिल्लामै पूर्वाधार भैदिए अन्र्तर्राष्ट्रि स्तरमै सफलता प्राप्त हुने उनको विश्वास छ ।
भारोत्तोलन खेलका सामाग्री महँगो हुने भएकाले पनि स्थानीय स्तरबाट जुटाउन नसकेको उनको भनाइ छ । बर्दियामा जिल्ला स्तरिय कभर्डहल भएपनि भारोत्तोलन खेल अभ्यासका लागि एउटा कोठासम्म उपलब्ध नभएको गुनासो उनले गरे ।
गुणस्तरिय खेल तथा खेलाडीका लागि स्थानीयतहले पनि चासो दिनुपर्ने उनको भनाइ छ । ग्रामिण स्तरमा सरकारले उदासिनता देखाएकोले पनि धेरै खेलाडीको मनोबल गिरेको अनुभव उनले सुनाए ।
प्रतिक्रिया दिनुहोस !
