ओखलढुंगा : सदरमुकामका स्वास्थ्य संस्थामा स्वास्थ्यकर्मीको लापरवाही बढेको गुनासो आएपछि सिद्धिचरण नगरपालिकाले ओखलढुंगा स्वास्थ्य चौकीमा अनुगमन गरेको छ ।
सेवाग्राही आउँदा औषधी छैन भनेर फर्काइएको, स्वास्थ्यकर्मीहरु आलोपालो गरेर घर र पसलमा बस्ने गरेको पाइएपछि अनुगमन गर्नुपरेको टोलीका सदस्य नगरपालिकाका प्रमुख प्रशासकीय अधिकृत भोजराज खतिवडाले बताए ।
अनुगमनको क्रममा खतिवडाले सबै स्वास्थ्यकर्मीलाई जिम्मेवार भएर सेवा प्रदान गर्न निर्देशन दिएका थिए । नगरपालिकाका उप प्रमुख इच्छाकुमारी गुरुङको नेतृत्वमा स्वास्थ्य चौकी अनुगमन गरिएको थियो । कार्यालय पनि जसोतसो चलाइएको, उपचार सेवा प्रभावकारी नहुँदा विरामी निजी क्लिनिकमा धाउने गरेको पाइएकाले अनुगमन गरेर सेवा प्रवाह प्रभावकारी बनाउन निर्देशन दिइएको उपप्रमुख गुरुङले बताइन् ।
सदरमुकाममा वरिपरी घर भएका स्वास्थ्यकर्मी आलोपालो गरेर कार्यालय आउने, हाजिरी गरेर हिँड्ने गरेपछि स्वास्थ्य चौकीमा अचेल सेवाग्राहीको संख्या ह्वात्तै घटेको छ । अनुगमनपछि निर्देशन पालना नभए कानुनी कारवाहीमा जाने नगरपालिकाले चेतावनी दिएको छ ।
प्रतिक्रिया दिनुहोस !
