लिबाङ : रोल्पामा यात्रुवाहक जिप दुर्घटना हुँदा एकजनाकाे मृत्यु भएको छ भने १२ जना घाइते छन् ।
सदरमुकाम लिबाङबाट मिरुल टुटु जाँदै गरेको लु १ ज ३३३२ नम्बरको जिप सोमबार दिउसो सडकबाट खोलामा खसेको हो । दुर्घटनामा २१ वर्षीया सञ्जु बुढामगरकाे मृत्यु भएकाे हाे । घाइतेमध्ये एकजनाकाे अवस्था चिन्ताजनक छ । निशा रोकामगरकी ९ महिने छोरीको अवस्था चिन्ताजनक रहेकाे प्रहरीले बताएकाे छ ।
परिवर्तन गाउँपालिका उपाध्यक्ष हितकुमारी बुढामगरका अनुसार परिवर्तन गाउँपालिका–१ कुरेली खरिबोटबाट दिउँसो ३ः३० बजेतिर जिप खोलामा खसेको थियो ।
परिवर्तन गाउँपालिका राङसीकी स्थायी बासिन्दा सञ्जु माघे संक्रान्तिको पर्व मनाउन कुरेलीस्थित माइत हिँडेकी थिइन् । घटनामा उनीसँगै जिपमा सवार उनको भाई र बहिनी समेत घाइते भएका छन् ।
निशा पनि स्थायी घर रोल्पा नगरपालिका–२ सिमलबाङबाट माघेसंक्रान्ति पर्व मनाउन माइत जाँदै गरेकी थिइन् । जिल्ला प्रहरी कार्यालयका प्रमुख प्रहरी नायव उपरिक्षक दिपक थापाका अनुसार दुर्घटनामा १२ जना घाइतेको स्थानीयबासिन्दा र खरिबोट प्रहरीले उद्धार गरेका थिए ।
उनीहरु सबैलाई जिल्ला अस्पताल रेउघामा उपचारका लागि ल्यायाइएको छ । घटनाका प्रत्यक्षदर्शी खरीबोटकी भिमा बुढामगरका अनुसार जिप सडकबाट सिधै खोलामा खसेको थियो । घाइते सबैको नाम र ठेगाना यकिन भइसकेको छैन ।
प्रहरीका अनुसार यस सडक खण्डमा प्रायः जिप क्षमता भन्दा बढी यात्रु बोकेर अप्ठ्यारो बाटो गुड्ने गर्छन् । घटनामा जिपका चालक समेत घाइते छन् । दुई सातायता जिल्लामा ५ वटा सवारी दुर्घटना भएका छन् । केही दिनअघि मात्रै परिवर्तन गाउँपालिकाकै बागमारा जाँदै गरेको ट्रयाक्टर दुर्घटना हुँदा एकजनाको मृत्यु भएको थियो ।
प्रतिक्रिया दिनुहोस !
