काठमाडौँ : गत माघ ११ गते पिकनिकबाट फर्कने क्रममा भएको सवारी दुर्घटनामा गम्भीर घाइते बाराका प्रमुख जिल्ला अधिकारी गणेशप्रसाद भट्टराईको सोमबार निधन भएको छ ।
सशस्त्र प्रहरीका उपरीक्षक बलराम पोखरेलको घटनास्थलमै ज्यान जाने गरी भएको सवारी दुर्घटनालाई सुरुबाटै रहस्यमय भनिएको छ । सोमबार ज्यान गुमाएका सिडिओ भट्टराईका परिवारले यसअघि नै घटनालाई रहस्यमय भन्दै छानबिन गर्न माग गरेका थिए ।
सिडिओ भट्टराईको निधन भएपछि सत्तारुढ दल नेपाल कम्युनिष्ट पार्टी (नेकपा) का नेता योगेश भट्टराईले यो प्रकरणको सरकारले छानबिन गर्नुपर्ने माग गरेका छन् ।
नेता भट्टराईले देशले एकजना कुशल र जनप्रिय प्रशासक गुमाएको बताउँदै यो दुर्घटनाबारे सरकारले छानबिन गर्नु पर्ने माग गरेका हुन् । भट्टराईले सीडीण गणेशप्रसाद सवार सवारी दुर्घटनाबारे अनेक आशंका र सन्देह उत्पन्न भएकाले छानबिन हुनुपर्ने बताएका हुन् ।
'सिडिओ भट्टराई सवार सवारी दुर्घटनाबारे अनेक आशंका र सन्देह सार्वजनिक भाइरहेको सन्दर्भमा छानबिन गर्न सरकारको ध्यानाकर्षण गर्दछु', योगेशले भनेका छन्, 'उहाँप्रति हार्दिक श्रद्धान्जली र परिवारजनमा गहिरो समवेदना ब्यक्त गर्दछु ।'केही दिनअघि सिडिओ भट्टराईका भाइ नरेश भट्टराईले राजधानीमा पत्रकार सम्मेलन गरे सिडिओ दाजुको सवारी दुर्घटना रहस्यमय रहेको भन्दै छानबिनका लागि सरकारलाई आग्रह गरेका थिए ।
चालक नियन्त्रणमा
यसअघि जिल्ला प्रहरी कार्यालयले बाराका प्रमुख जिल्ला अधिकारी (सिडिओ) गणेश भट्टराईका सवारी चालक जगतनारायण कुर्मीलाई नियन्त्रणमा लिएको थियो ।
माघ ११ गते बाराको पथलैया-निजगढ सडक खण्डको पसाहा पुल नजिक दुर्घटना भएको सिडिओको सवारीका चालक कुर्मीलाई अस्पतालबाट डिस्चार्ज भएलगत्तै माघ १८ गते प्रहरीले नियन्त्रणमा लिएको थियो । दुर्घटनामा सामान्य घाइते उनी वीरगन्जस्थित हेल्थ केयर अस्पतालमा उपचाररत थिए ।
जिल्ला प्रहरी कार्यालय बाराका प्रवक्ता रञ्जितसिंह राठौरले चालकको लापरवाहीका कारण दुर्घटना भएको देखिएकाले अनुसन्धानका लागि नियन्त्रणमा लिएको बताएका थिए । उनलाई सवारी ज्यान मुद्दा ऐन अन्तर्गत कारवाही हुने प्रवक्ता राठौरले बताएका थिए । दुर्घटनास्थल इलाका प्रहरी कार्यालय निजगढको क्षेत्रभित्र रहेकाले निजगढ प्रहरीले कारवाही प्रक्रिया अगाडी बढाएको छ ।
प्रतिक्रिया दिनुहोस !
