भक्तपुर : भक्तपुरमा जारी अठारौं सैनिक कप अन्तरविद्यालय रनिङ फुटबल प्रतियोगिताको क्वार्टरफाइनलको समीकरण पूरा भएको छ।
भक्तपुरको सल्लाघारीस्थित सैनिक आवासीय महाविद्यालयद्वारा आयोजित प्रतियोगिताअन्तर्गत मंगलबार लिग चरणमा सम्पूर्ण स्पर्धा सकिएसँगै क्वार्टरफाइनल पुग्ने सम्पूर्ण टीमको टुंगो लागेको हो।
मंगलबार भएका लिग खेलबाट समूह ए बाट सैनिकको रिपमर्दिनी स्कुल, समूह सी बाट जेम्स र समूह डी बाट बुढानिलकण्ठ स्कुलले क्वार्टरफाइनलको यात्रा गरेका हुन्।
रिपुमर्दिनीले त्रियोग स्कुललाई २-१ गोलले हराउँदै अन्तिम आठमा स्थान पक्का गरेको हो। त्यस्तै काठमाडौं भ्यालीलाई ४-० गोलले पन्छाउँदै जेम्स स्कुल समूह उपविजेता बन्दै क्वार्टरफाइनलमा पुग्न सफल भयो।
अर्को खेलमा लिटिल एञ्जेन्ससँग ३-१ गोलले पराजित भएर पनि बुढानिलकण्ठ स्कुलले क्वार्टरफाइनलको यात्रा तय गरेको छ। लिटिल एञ्जेल्स समूह विजेता बन्दा बुढानिलकण्ठ उपविजेता बनेको हो।
बुधबार प्रतियोगिताअन्तर्गत क्वार्टरफाइनलका सम्पूर्ण खेल हुने आयोजक सैनिकका खेलकुद इन्चार्ज रञ्जित राणाले जानकारी दिए।
उनका अनुसार पहिलो क्वार्टरफाइनलमा आयोजक सैनिकको ए टीम र जेम्स स्कुल आमनेसामने हुनेछन्। त्यसपछि साइपला एकेडेमी र बुढानिलकण्ठ तथा नेपाल प्रहरी स्कुल र रिपुमर्दिनी स्कुलबीच स्पर्धा हुनेछ। अन्तिम क्वार्टरफाइनलमा लिटिल एञ्जेल्सले आयोजक सैनिकको बी टीमको सामना गर्ने उनले बताए।
प्रतियोगितामा काठमाडौं उपत्यकाका १४ स्कुलको सहभागिता रहेको छ।
प्रतिक्रिया दिनुहोस !
