मस्को : चिनियाँ राष्ट्रपति सि जिन पिङ तीनदिने भ्रमणको क्रममा यतिबेला रुसमा छन् । उनी बुधबार रुस पुगेर यहाँका राष्ट्रपति भ्लादिमिर पुटिनसँग भेटवार्ता गरिसकेका छन् ।
यस क्रममा सि र पुटिनबीच दुई देशबीचको कुटनीति तथा आर्थिक सम्बन्धबारे छलफल हुने बताइएको छ । साथै अमेरिकासँग बढ्दो व्यापारिक तनाबलाई दुई देशको सहकार्य मार्फत कसरी समाधान गर्ने भन्नेबारे पनि वार्ता हुने अन्तर्राष्ट्रिय मिडियाले जनाएका छन् ।
भ्रमणसँगै संयुक्त विज्ञप्तिमार्फत पत्रकारहरुसँग सिले भनेका छन् ‘ मेरो लागि राष्ट्रपति पुटिन प्रिय साथी हुन् । हामीले नयाँ युगसँगै आपसी सहयोग र सम्बन्धलाई थप नयाँ उचाइमा लैजाने निर्णय गरेका छौँ ।’
साथै पुटिनले पनि सहायताका लागि चिनियाँ राष्ट्रपतिलाई धन्यवाद प्रदान गरेका छन् । उनले भनेका छन्, ‘यो रुसमाथि विशेष सम्मान र विशेष विश्वासको संकेत हो ।’
साथै चीनसँगको ‘पान्डा डिप्लोमेसी’को पनि पुटिनले प्रसंशा गरेका थिए । पुटिनले भने, ‘जब हामी पान्डा डिप्लोमेसीको कुरा गर्छौँ, हाम्रो अनुहारमा मुस्कान छाउँछ ।’
दुई देशका प्रमुखहरुले यस क्रममा रणनीतिक सहकार्यबारे संयुक्त वक्तव्यमा हस्ताक्षर गरिसकेका छन् । आर्थिक विकासमा फड्को मार्दै गरेको चीन अमेरिकासँग व्यापारिक सम्बन्ध टाढिँदै गर्दा रुससँग नजिकिँदै गरेको छ । चीन र रुस असल मित्र राष्ट्रको रुपमा पनि चिनिन्छन् ।
प्रतिक्रिया दिनुहोस !
