काठमाडौं : तेस्रो संस्करणको प्रधानमन्त्री कप एकदिवसीय राष्ट्रिय क्रिकेट प्रतियोगिताको उपाधि नेपाल पुलिस क्लबले जितेको छ । पुलिसले त्रिभुवन आर्मी क्लबलाई चार विकेटले पराजित गर्दै उपाधि जितेको हो ।
आर्मीले दिएको १२६ रनको लक्ष्य पुलिसले ४०.३ ओभरमा ६ विकेट गुमाएर पूरा गर्यो । पुलिसको जितमा प्रारम्भिक ब्याट्सम्यान सुनिल धमलाले ४२ रनको अविजित पालि खेले । निकै सुस्त गतिमा रन बनाएका उनले १३१ बलमा दुई चौका हिर्काए । यस्तै अमित श्रेष्ठले ४४ रन बनाउँदा कप्तान मञ्जित श्रेष्ठले ११ रन बनाए ।
आर्मीका करन केसीले तीन विकेट लिए । यस्तै सहाब आलमले दुई तथा सुशन भारीले एक विकेट हात पारे ।
यसअघि टस जितेर पहिले ब्याटिङ गरेको आर्मीले ३३.३ ओभरमा अलआउट हुँदै १२५ रन मात्र बनाउन सक्यो । पुलिसका पवन सर्राफ र ललितनारायण राजवंशीले धारिलो बलिङ गर्दै आर्मीलाई दबाबमा राखेका थिए । पवन र ललितले चार÷चार विकेट लिए । यस्तै सागर ढकालले पनि एक विकेट हात पारे ।
राजु रिजाल र सोमपाल कामीले आर्मीलाई उत्कृष्ट सुरुआत दिलाएका थिए । दुवैले पहिलो विकेटका लागि ७२ रनको साझेदारी गरेका थिए । ७२ रनमा सोमपाल कामी व्यक्तिगत ३५ रनमा पेभेलियन फर्किएपछि आर्मीको विकेट पतन सुरु भएको थियो । राजुले ३२ रन बनाउँदा अन्य ब्याट्सम्यानले गतिलो प्रदर्शन गर्न सकेनन् । आर्मीका भीम सार्की २० र रोहित पौडेल १८ रन बनाएर आउट भए । उनीहरूबाहेक अन्यले दोहोरो अंकमा रन बनाउन सकेनन् । फाइनल खेलको म्यान अफ दी म्याच पुलिसका ललित राजवंशी घोषित भए ।
राष्ट्रिय खेलकुद परिषद्को आयोजना र नेपालयको व्यवस्थापनको भएको प्रतियोगिताको उपाधि विजेता पुलिसले २० लाख रुपैयाँ प्राप्त गर्यो । उपविजेता आर्मीले भने १० लाख रुपैयाँमा चित्त बुझायो ।
प्रतिक्रिया दिनुहोस !
