किमको क्षेप्यास्त्रदेखि बोरिसको ‘महान ब्रिटेन’सम्म : कहाँ के भयाे ?

उत्तर कोरियाको क्षेप्यास्त्र प्रहार : दक्षिणलाई चेतावनी

सोल : उत्तर कोरियाली नेता किम जोङ उनले यही बिहीबार नयाँ प्रकारको क्षेप्यास्त्र परीक्षण गरेका थिए ।

उक्त घटनाबारे चारै तिरबाट चासो देखाइरहँदा नेता किमले त्यो क्षेप्यास्त्रले दक्षिणलाई चेतावनी दिएको प्रतिक्रिया दिएका छन् । दक्षिण कोरियाले उच्च प्रविधियुक्त हतियार भित्र्याएको र अमेरिकी सेनासँग सैन्यअभ्यास नरोकेको भन्दै यस्तो चेतावनी दिएको किमले बताए ।

सिरिया युद्धको अनुहार : भत्किएको घरबाट बालिकाको हारगुहार

सिरिया : सिरियामा जारी युद्धको विद्रुप अनुहार एउटा अमानवीय घटनाले प्रतिनिधित्व गरेको छ । हालै यहाँ सरकारी हमलाको क्रममा भत्किएको घरको अक्करमा च्यापिएका दुई बालिकाको तस्बिर र भिडियो सामाजिक सञ्जालमा भाइरल भएको छ ।

हमलापछि भत्किँदै गरेको घरको चेपको धरापमा अड्किएकी दुधे बालिकालाई उद्दार गर्न उनकै सानी दिदीले गरेको प्रयासले धेरैलाई चकित पार्छ । ती बालिकालाई उद्दारकर्मी र स्थानीयले भग्नावशेष घरबाट त झिके तर अस्पतालमा पुगेपछि उनको मृत्यु भयो ।

भारतीय तेल ट्याङ्कर छाड्दै इरान

नयाँदिल्ली : इरानले दुई सातादेखि कब्जामा लिइराखेका ९ वटा भारतीय तेल ट्याङ्करलाई रिहा गरिदिएको बताइएको छ ।

भारतीय विदेशमन्त्रालयका प्रवक्ता रविश कुमारले शुक्रबार विज्ञप्ति जारी गर्दै यस्तो जानकारी दिएका हुन् । अब ती ट्याङ्कर छिट्टै भारतका लागि छुट्ने उनले बताएका छन् ।

यद्यपि इरानी अधिकारीहरुबाट यसबारे कुनै प्रतिक्रिया सार्वजनिक भएको छैन । गैरकानुनी रुपमा तेल ओसारेको भन्दै इरानले भारत, बेलायत लगायत मुलुकका तेल ट्याङ्करलाई कब्जामा लिँदैआएको थियो ।

लिबियामा पानीजहाज दुर्घटना : १५० को उद्धार अझै हुन सकेन

लिबिया : तीन सयजति शरणार्थी र आप्रवासीहरुलाई बोकेर कुदेका दुई पानीजहाज लिबियाको समुद्र किनारमा डुबेका छन् । दुर्घटनापछि एउटा जहाजमा रहेका १ सय ४५ यात्रुको उद्दार भएको छ । उनीहरु उद्दारपछि लिबिया फर्किएका छन् ।

अर्को जहाजमा रहेका १ सय ५० यात्रुको उद्दारका लागि उद्दारकर्मी खटिएका छन् । उद्दारकर्मी खटिए पनि यात्रामा रहेकाहरु बाँच्ने सम्भावना अति न्युन रहेको अधिकारी तथा सहयोग एजेन्सीहरुले बताएका छन् । दुर्घटनामा महिला र बालबालिका समेत रहेको बताइएको छ ।

ब्रेक्जिटबाटै ‘महान ब्रिटेन’ बनाउने बोरिसको बाचा

लण्डन : बेलायतका नयाँ प्रधानमन्त्री बोरिस जोन्सनले ब्रेक्जिटले नै बेलायतलाई विश्वकै महान भूमिको रुपमा चनिाउने बताएका छन् ।

ब्रेक्जिट मुद्दा नै बोरिसको मुख्य चुनौतीको रुपमा व्याख्या गरिरहँदा पहिलो भाषणमा नै उनले यसबाट बेलायतलाई थप समृद्ध बनाउने प्रतिवद्धता जाहेर गरेका हुन् ।

बोरिसको राष्ट्रवादी मुद्दालाई पनि अन्तर्राष्ट्रिय मिडियाले अमेरिकी राष्ट्रपति डोनल्ड ट्रम्पको ‘अमेरिका फस्र्ट’सँग तुलना गरी टिप्पणी गरेका छन् ।

इजरायलसँगका सम्झौता स्थगित गर्ने प्यालेस्टाइनको घोषणा

प्यालेस्टाइन : प्यालेस्टाइनका राष्ट्रपति मोहम्मद अब्बासले इजरायलसँग भएका सबै सम्झौता आफूहरुले स्थगित गरेको घोषणा गरेका छन् ।

प्यालेस्टाइनी लिबरेशन अर्गनाइजेशनको आपतकालिन बैठकपछि ८४ वर्षे नेता अब्बासले यस्तो घोषणा गरेका हुन् । रामाल्लाहस्थित अब्बासले भाषणको क्रममा भने, ‘नेतृत्वले इजरायलसँग हस्ताक्षरित सम्झौता रोक्नका लागि नेतृत्वले गरेको निर्णय हामी घोषणा गर्छौँ ।’

इजरायली अधिकारीले प्यालेस्टाइनी अधिकारीसँगका सम्झौता अस्वीकार गरेपछि आफूहरुले निर्णय गरेको अब्बासले बताए ।

अमेरिकी विदेशमन्त्री भन्छन् : इरानले बोलाए वार्ता गर्न खुसी भएर जान्छु

वासिङ्टन : अमेरिकी विदेशमन्त्री माइक पोम्प्योले इरानसँगको द्वन्द्व मत्थर पार्नका लागि आफू इरान जान तयार रहेको बताएका छन् ।

ब्लुमबर्ग टेलिभिजनलाई हालै दिएको अन्तर्वार्तामा उनले भने, ‘हो, यदी बोलावत भयो भने म खुसी भएर त्यहाँ जान्छु, म इरानी जनतासँग कुराकानी गर्न पाउने अवसरलाई स्वागत गर्छु ।’ पोम्प्योको उक्त अभिव्यक्तिमाथि इरानले भने कुनै जवाफ दिएको छैन ।

गत वर्षदेखि नै इरान र अमेरिकाबीच द्धन्द्ध बढेको हो । इरान र अमेरिका युद्धउन्मुख भइरहँदा अमेरिकी नेताले द्वन्द्व समाधानको लागि आवस्यक परे आफू जान तयार रहेको बताएका हुन्।